പ്രധാനമന്ത്രി മാർക്ക് കാർണിയെ വധിക്കുമെന്ന് ഭീഷണിപ്പെടുത്തിയെന്നാരോപിച്ച് എഡ്മിന്‍റൻ സ്വദേശിക്കെതിരെ കേസെടുത്തു. സോഷ്യൽ മീഡിയ പ്ലാറ്റ്‌ഫോമായ ‘X’ (ട്വിറ്റർ)-ൽ വന്ന പോസ്റ്റുകളെക്കുറിച്ചുള്ള അന്വേഷണത്തിലാണ് 44 വയസ്സുള്ള ഡ്വൈറ്റ് പീറ്റർ മാക്കിന്‍റയറിനെ അറസ്റ്റ് ചെയ്തത്. ക്രിമിനൽ കോഡിലെ സെക്ഷൻ 264 പ്രകാരം, വധഭീഷണി മുഴക്കിയെന്ന കുറ്റമാണ് മാക്കിന്‍റയറിന് മേൽ ചുമത്തിയിരിക്കുന്നത്.

ഓൺലൈനിൽ ഭീഷണിപ്പെടുത്തിയാൽ യാതൊരു നടപടിയും നേരിടേണ്ടിവരില്ലെന്ന് ആളുകൾ കരുതരുത്, ആർ‌സി‌എം‌പി (RCMP)-യുടെ ‘ഇന്‍റഗ്രേറ്റഡ് നാഷണൽ സെക്യൂരിറ്റി എൻഫോഴ്‌സ്‌മെൻ്റ് ടീം’ (INSET) സൂപ്രണ്ട് മാറ്റ് ജോൺസൺ മുന്നറിയിപ്പ് നൽകി. സ്‌ക്രീനിന് പിന്നിലിരുന്ന് ചെയ്യുന്നതാണെങ്കിൽ പോലും, ഓൺലൈനിലൂടെയുള്ള ക്രിമിനൽ പ്രവൃത്തികൾക്ക് യഥാർത്ഥ ജീവിതത്തിൽ ഗുരുതരമായ പ്രത്യാഘാതങ്ങൾ ഉണ്ടാകും, അദ്ദേഹം വ്യക്തമാക്കി.