വയനാട്ടിൽ മാനന്തവാടി പിലാക്കാവ് പഞ്ചാരക്കൊല്ലിയിൽ സ്കൂൾ ബസ്സിന് നേരെ കാട്ടുപോത്തിന്റെ പരക്കംപാച്ചിലും ആക്രമണവുമുണ്ടായി. തലപ്പുഴ ചിറക്കരയിലെ തേയിലത്തോട്ടത്തിൽ നിലയുറപ്പിച്ചിരുന്ന കാട്ടുപോത്ത് പെട്ടെന്ന് റോഡിലേക്ക് ചാടിവീഴുകയും കണിയാരം സെന്റ് ജോസഫ് ടിടിഎയുടെ ബസ്സിന് നേരെ പാഞ്ഞടുക്കുകയുമായിരുന്നു.
പോത്തിന്റെ കുത്തേറ്റ് ബസ്സിന്റെ വശത്തെ ഗ്ലാസുകൾ പൂർണ്ണമായി തകരുകയും, ആ ഭാഗത്തെ കമ്പികൾ വളഞ്ഞ നിലയിലാകുകയും ചെയ്തു. ഈ ആക്രമണത്തിൽ ബസിലുണ്ടായിരുന്ന രണ്ട് വിദ്യാർത്ഥികൾക്കാണ് പരുക്കേറ്റത്. ഉടൻ തന്നെ ഇവരെ മാനന്തവാടി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും, ഇരുവർരുടെയും പരുക്കുകൾ ഗുരുതരമല്ലെന്ന് അധികൃതർ വ്യക്തമാക്കി. പ്രദേശത്ത് വർദ്ധിച്ചുവരുന്ന വന്യമൃഗശല്യത്തിനെതിരെ ശക്തമായ നടപടികൾ സ്വീകരിക്കണമെന്ന് ആവശ്യപ്പെട്ട് നാട്ടുകാർ രംഗത്തെത്തിയിട്ടുണ്ട്.
