കാനഡയിലുള്ള കനേഡിയൻ പൗരന്മാരിൽ നിന്നുള്ള എംപ്ലോയ്‌മെന്റ് വിസ അപേക്ഷകൾ സ്വീകരിക്കുന്നത് കാനഡയിലെ ഇന്ത്യൻ കോൺസുലാർ ഓഫീസുകൾ പുനരാരംഭിച്ചു. പുതിയ വ്യവസ്ഥയനുസരിച്ച് അപേക്ഷകർക്ക് ഇപ്പോൾ പ്രീ-അപ്രൂവൽ (മുൻകൂർ അനുമതി) ആവശ്യമാണ്.
പരിഷ്കരിച്ച പ്രക്രിയ പ്രകാരം, അപേക്ഷകർ ആദ്യം കോൺസുലാർ ഓഫീസിൽ നിന്ന് ആവശ്യമായ അനുമതി നേടണം. അതിനുശേഷം മാത്രമേ ഒറിജിനൽ പാസ്‌പോർട്ട് സമർപ്പിക്കാനും, വിസ ഫീസ് അടയ്ക്കാനും, നേരിട്ടെത്തി അപേക്ഷാ നടപടികൾ പൂർത്തിയാക്കാനും സാധിക്കൂ.
ബയോമെട്രിക് എൻറോൾമെന്റ് നിർബന്ധമാക്കി
എംപ്ലോയ്‌മെന്റ് വിസ അപേക്ഷകർക്ക് ബയോമെട്രിക് എൻറോൾമെന്റ് നിർബന്ധമാക്കിയതായി ഫ്രാഗോമൻ (Fragomen) റിപ്പോർട്ട് വ്യക്തമാക്കുന്നു. ഇതിന്റെ ഭാഗമായി, മുൻപുണ്ടായിരുന്ന തപാൽ (പോസ്റ്റൽ) വഴി അപേക്ഷ സമർപ്പിക്കുന്ന രീതി ഇനി ലഭ്യമാകില്ല.
ഈ ഇളവ് കനേഡിയൻ പൗരന്മാർക്കുള്ള എംപ്ലോയ്‌മെന്റ് വിസകൾക്ക് മാത്രമായി പരിമിതപ്പെടുത്തിയിരിക്കുന്നു. പ്രത്യേക സ്ഥിരീകരണം ലഭിക്കാത്തപക്ഷം മറ്റ് വിസ വിഭാഗങ്ങൾ പുനരാരംഭിച്ചതായി കരുതരുത്.
2023-ൽ വിസ സേവനങ്ങൾ നിർത്തിവെച്ചിരുന്നു
2023 സെപ്റ്റംബറിലാണ് കനേഡിയൻ പൗരന്മാർക്കും കാനഡയിൽ നിന്ന് അപേക്ഷിക്കുന്ന വിദേശ പൗരന്മാർക്കുമുള്ള ഇ-വിസകൾ ഉൾപ്പെടെയുള്ള ഇന്ത്യൻ വിസകളുടെ സ്വീകാര്യതയും പ്രൊസസിംഗും ഇന്ത്യ താത്കാലികമായി നിർത്തിവെച്ചത്.
തുടർന്ന് ചില സേവനങ്ങൾ ഘട്ടങ്ങളായി പുനഃസ്ഥാപിച്ചു. 2023 ഒക്ടോബർ 26-ന് ടൊറന്റോ, ഒട്ടാവ, വാൻകൂവർ എന്നിവിടങ്ങളിലെ ഇന്ത്യൻ കോൺസുലേറ്റുകൾ എൻട്രി, ബിസിനസ്, മെഡിക്കൽ, കോൺഫറൻസ് വിസ സേവനങ്ങൾ പുനരാരംഭിച്ചു. പിന്നീട് 2023 നവംബർ 22-ന് കനേഡിയൻ പൗരന്മാർക്കായി ഇലക്ട്രോണിക് ബിസിനസ് വിസകളും ഇന്ത്യ പുനഃസ്ഥാപിക്കുകയുണ്ടായി.
