ഓപ്പൺ ഹാർട്ട് സർജറിക്ക് (തുറന്ന ഹൃദയ ശസ്ത്രക്രിയ) ശേഷം അടിയന്തിരമായി ലഭ്യമാക്കേണ്ടിയിരുന്ന തുടർചികിത്സകൾക്കുള്ള യാത്രാസൗകര്യം നിഷേധിക്കപ്പെട്ടതിനെ തുടർന്ന് വടക്കൻ ഒന്റാറിയോയിലെ ഫസ്റ്റ് നേഷൻ (ആദിവാസി വിഭാഗം) യുവതി മരിച്ച സംഭവത്തിൽ പ്രൊവിൻഷ്യൽ പോലീസ് അന്വേഷണം വേണമെന്ന് കുടുംബം ആവശ്യപ്പെട്ടു. കഴിഞ്ഞ ഏപ്രിലിൽ നടന്ന ശസ്ത്രക്രിയയ്ക്ക് ശേഷമുള്ള തുടർപരിശോധനകൾക്കായി യാത്രാസൗകര്യം ഒരുക്കുന്നതിൽ തദ്ദേശീയ സേവന വകുപ്പിന് (Indigenous Services Canada) കീഴിലുള്ള ഇൻഷുറൻസ് ഇതര ആരോഗ്യ ആനുകൂല്യ പ്രോഗ്രാം (NIHB) പരാജയപ്പെട്ടതിനെ തുടർന്ന് സെപ്റ്റംബറിലാണ് 31-കാരിയായ മിറാൻഡ മമാക്വ മരിച്ചതെന്ന് മാതാവ് ഈവ മമാക്വ പറഞ്ഞു. ഹഡ്സൺ ബേയിലെ സെവേൺ നദീതീരത്തുള്ള, വിമാനമാർഗ്ഗം മാത്രം എത്തിച്ചേരാൻ കഴിയുന്ന ഫോർട്ട് സെവേൺ ഫസ്റ്റ് നേഷൻ ഗ്രാമത്തിൽ മൂന്ന് മക്കളോടും മാതാപിതാക്കളോടും ഒപ്പമാണ് മിറാൻഡ താമസിച്ചിരുന്നത്.

ശസ്ത്രക്രിയയ്ക്ക് ശേഷം രക്തം കട്ടപിടിക്കുന്ന അവസ്ഥ നേരിട്ടതിനാൽ, രക്തം കട്ടപിടിക്കാതിരിക്കാനുള്ള മരുന്നുകൾ കഴിച്ചിരുന്ന മിറാൻഡയ്ക്ക് തുടർച്ചയായ പരിശോധനകൾ അത്യന്താപേക്ഷിതമായിരുന്നു. ഗ്രാമത്തിലെ നഴ്സിംഗ് സ്റ്റേഷൻ വഴി NIHB പ്രോഗ്രാമുമായി ബന്ധപ്പെട്ട് യാത്രാസൗകര്യത്തിനായി ശ്രമിച്ചെങ്കിലും അധികൃതർ നടപടിയെടുത്തില്ലെന്ന് കുടുംബം ആരോപിക്കുന്നു. പ്രോഗ്രാമിലെ ജീവനക്കാർക്ക് ഈ വിഷയത്തിൽ ഒരു ശ്രദ്ധയും ഉണ്ടായിരുന്നില്ലെന്ന് മാതാവ് കൂട്ടിച്ചേർത്തു. സഹായം ലഭിക്കാതെ മടുത്ത മിറാൻഡ ഓഗസ്റ്റ് പകുതിയോടെ ഫേസ്ബുക്കിൽ കുറിച്ചത്: “ഞാൻ മരിക്കുകയാണെങ്കിൽ, ദയവായി ഇതിന് കാരണക്കാരായവർക്കെതിരെ നിയമനടപടി സ്വീകരിക്കണം.” സെപ്റ്റംബർ 8-ന് തലച്ചോറിലെ രക്തസ്രാവത്തെ തുടർന്ന് മിറാൻഡ മരണപ്പെടുകയായിരുന്നു. ‘ഇത് ഒരിക്കലും സംഭവിക്കാൻ പാടില്ലാത്തതായിരുന്നു’ സ്വകാര്യ ഇൻഷുറൻസോ പ്രൊവിൻഷ്യൽ ഹെൽത്ത് പ്ലാനുകളോ ലഭ്യമല്ലാത്ത ഫസ്റ്റ് നേഷൻസ്, ഇൻയൂയിറ്റ് വിഭാഗത്തിൽപ്പെട്ട ആളുകൾക്ക് മെഡിക്കൽ, ദന്തൽ, മാനസികാരോഗ്യ പരിരക്ഷ ഉറപ്പാക്കുന്ന പദ്ധതിയാണ് NIHB.

മിറാൻഡയുടെ കേസ് കൈകാര്യം ചെയ്ത സിയോക്സ് ലുക്ക്ഔട്ടിലെ NIHB ശാഖയിലെ ഉദ്യോഗസ്ഥർക്കെതിരെ ക്രിമിനൽ അന്വേഷണം നടത്തണമെന്ന് കുടുംബം ഒന്റാറിയോ പ്രൊവിൻഷ്യൽ പോലീസിനോട് (OPP) ആവശ്യപ്പെട്ടു. മെയ് മുതൽ ഓഗസ്റ്റ് വരെ ഹൃദ്രോഗ വിദഗ്ധരെ കാണുന്നതിനുള്ള യാത്രാ അപേക്ഷകൾ നാല് തവണയാണ് അധികൃതർ നിരസിച്ചത്. “മിറാൻഡയ്ക്ക് ഇത് ഒരിക്കലും സംഭവിക്കാൻ പാടില്ലായിരുന്നു,” മാതാപിതാക്കളായ ഈവ മമാക്വയും മൈക്ക് ബ്ലൂകോട്ട് പുറപ്പെടുവിച്ച പ്രസ്താവനയിൽ പറഞ്ഞു. “അവൾ ഇന്ന് ജീവിച്ചിരിക്കേണ്ടതായിരുന്നു. ഈ ദാരുണമായ വീഴ്ച എങ്ങനെ സംഭവിച്ചുവെന്ന് അറിയാൻ ഞങ്ങൾക്ക് അവകാശമുണ്ട്. അടിയന്തിര യാത്രാ അപേക്ഷകൾ അവഗണിച്ച വ്യക്തികൾ ഇതിന് ഉത്തരവാദികളാകണം. അവരുടെ വീഴ്ച കാരണം ഞങ്ങൾക്ക് മകളെയും അവളുടെ മക്കൾക്ക് അമ്മയെയുമാണ് നഷ്ടപ്പെട്ടത്.”

അന്വേഷണം പ്രഖ്യാപിച്ച് ഡിപ്പാർട്ട്മെന്റ്

വ്യാഴാഴ്ചയാണ് കുടുംബത്തിന്റെ അഭിഭാഷകൻ ജൂലിയൻ ഫോൾക്കണർ പോലീസിന് പരാതിക്കത്ത് അയച്ചത്. എന്നാൽ സംഭവത്തിൽ ഒ.പി.പി ഔദ്യോഗികമായി പ്രതികരിച്ചിട്ടില്ല. “ഈ രാജ്യത്ത് തദ്ദേശീയ വിഭാഗങ്ങൾക്ക് ആരോഗ്യ സേവനങ്ങൾ നൽകുന്നതിൽ വർണ്ണവിവേചനത്തിന് സമാനമായ വേർതിരിവാണ് നിലനിൽക്കുന്നത്. ഇത് ഉടനടി അവസാനിക്കണം,” അഭിഭാഷകൻ വ്യക്തമാക്കി.

സംഭവത്തെക്കുറിച്ച് വിശദമായ പരിശോധന നടത്തുമെന്നും മെഡിക്കൽ യാത്രാ സംവിധാനങ്ങൾ കൂടുതൽ ലളിതമാക്കാൻ ഒക്ടോബർ ആദ്യത്തോടെ നടപടികൾ സ്വീകരിച്ചിട്ടുണ്ടെന്നും തദ്ദേശീയ സേവന മന്ത്രി മാൻഡി ഗുൾ-മാസ്റ്റി അറിയിച്ചു. പ്രോഗ്രാമിലെ അനാസ്ഥയ്‌ക്കെതിരെ ഫസ്റ്റ് നേഷൻ നേതാക്കളും ജനങ്ങളും ശക്തമായ പ്രതിഷേധത്തിലാണ്. സിയോക്സ് ലുക്ക്ഔട്ട് ഓഫീസിന് മുന്നിൽ നൂറുകണക്കിന് ആളുകൾ ധർണ നടത്തുകയും നിയമനടപടികളുമായി മുന്നോട്ട് പോകുകയും ചെയ്തിട്ടുണ്ട്. യാത്രാസൗകര്യം ലഭിക്കാത്തതിനാൽ വിദൂര പ്രദേശങ്ങളിലെ ആളുകൾക്ക് നൂറുകണക്കിന് മെഡിക്കൽ അപ്പോയിന്റ്മെന്റുകളാണ് നഷ്ടപ്പെടുന്നത്.