ന്യൂ മെക്സിക്കോയിൽ തന്റെ 11 മാസം മാത്രം പ്രായമുള്ള ബേസിൽ സ്ട്രോണർ എന്ന കുഞ്ഞിനെ വെടിവെച്ച് കൊലപ്പെടുത്തിയ കേസിൽ മാതാവ് മാഡ്ലൈൻ വെറോണിക് ഡാലി (36) കുറ്റക്കാരിയാണെന്ന് കോടതി കണ്ടെത്തി. കുട്ടിയുടെ പിതാവുമായി അകന്നു കഴിയുകയായിരുന്ന മാഡ്ലൈൻ, കുഞ്ഞിന്റെ അടിയന്തര കസ്റ്റഡി പിതാവിന് നൽകിക്കൊണ്ടുള്ള കോടതി ഉത്തരവിനെ തുടർന്ന് കുട്ടിയുമായി വയയോമിങ്ങിൽ നിന്ന് ന്യൂ മെക്സിക്കോയിലേക്ക് കടന്നുകളയുകയായിരുന്നു.
തുടർന്ന് നടത്തിയ തിരച്ചിലിൽ ഗ്രാന്റ് കൗണ്ടി ഷെരീഫ് ഉദ്യോഗസ്ഥർ ന്യൂ മെക്സിക്കോയിലെ ഒരു ഹൈവേയ്ക്ക് സമീപമുള്ള ബങ്ക്ഹൗസിൽ വെച്ച് ഇവരെ കണ്ടെത്തുകയും തട്ടിക്കൊണ്ടുപോകൽ കേസിൽ അറസ്റ്റ് ചെയ്യാൻ ശ്രമിക്കുകയും ചെയ്തു. ഇതിനിടയിൽ ഓടി രക്ഷപ്പെടാൻ ശ്രമിച്ച മാഡ്ലൈൻ സമീപത്തെ വാഹനത്തിൽ കയറുകയും, വാഹനം വളഞ്ഞ ഉദ്യോഗസ്ഥർ സെർച്ച് വാറണ്ടിനായി കാത്തുനിൽക്കുന്നതിനിടെ വാഹനത്തിനുള്ളിൽ വെച്ച് സ്വന്തം കുഞ്ഞിന് നേരെ വെടിയുതിർക്കുകയുമായിരുന്നു.
വെടിയേറ്റ കുഞ്ഞ് ഗുരുതരാവസ്ഥയിൽ മരണത്തിന് കീഴടങ്ങി. കുട്ടിയെ ഒരു കാരണവശാലും പിതാവിന് വിട്ടുകൊടുക്കില്ലെന്ന മാഡ്ലൈന്റെ കടുത്ത വൈരാഗ്യവും വാശിയുമാണ് ഈ ദാരുണമായ കൊലപാതകത്തിന് വഴിവെച്ചതെന്ന് വ്യക്തമായി. കേസിലെ പ്രതിയായ മാഡ്ലൈൻ കുറ്റക്കാരിയാണെന്ന് സ്ഥിരീകരിച്ച കോടതി, ഇവർക്കുള്ള ശിക്ഷാവിധി പിന്നീട് പുറപ്പെടുവിക്കും.
