പ്രവിശ്യാ തിരഞ്ഞെടുപ്പിലുണ്ടായ കനത്ത പരാജയത്തിനു പിന്നാലെ, എൻഡിപി കോക്കസ് (പാർട്ടി അംഗങ്ങളുടെ യോഗം) ഇന്ന് ചേരും. തിരഞ്ഞെടുപ്പ് എന്തിനാണ് ഇത്ര പെട്ടെന്ന് പ്രഖ്യാപിച്ചത് എന്നതുൾപ്പെടെയുള്ള കടുത്ത ചോദ്യങ്ങൾ ഉയരാൻ സാധ്യതയുള്ളതിനാൽ, അതീവ ഗൗരവകരവും സംഘർഷഭരിതവുമായിരിക്കും യോഗമെന്ന് പ്രതീക്ഷിക്കുന്നു.
അതേസമയം ഡേവിഡ് എബിയുടെ പിൻഗാമിയായി ഇടക്കാല നേതാവിനെ ഈ ആഴ്ച തന്നെ നിയമിക്കുമെന്ന് എൻഡിപി അറിയിച്ചു. മൈക്ക് ഫാർൺവർത്ത്, അഡ്രിയാൻ ഡിക്സ്, കൂടാതെ ബോവിൻ മാ ഉൾപ്പെടെയുള്ള യുവനേതാക്കളുടെ പേരുകളാണ് പരിഗണനയിലുള്ളത്. കനത്ത പരാജയത്തിന് ശേഷം തകർന്നുനിൽക്കുന്ന പാർട്ടിയെ ഫലപ്രദമായി ഏകോപിപ്പിക്കാൻ കഴിയുന്ന, വിവാദങ്ങളിൽപ്പെടാത്ത ഒരാളെയാകും പാർട്ടി ചുമതലപ്പെടുത്തകയെന്ന് യുബിസി (UBC) പൊളിറ്റിക്കൽ സയൻ്റിസ്റ്റ് സ്റ്റുവർട്ട് പ്രെസ്റ്റ് പറയുന്നു.
ഇടക്കാല നേതാവായി തിരഞ്ഞെടുക്കപ്പെടുന്ന ആൾക്ക്, പിന്നീട് നടക്കുന്ന സ്ഥിരം നേതൃസ്ഥാനത്തേക്കുള്ള തിരഞ്ഞെടുപ്പിൽ മത്സരിക്കാൻ അനുവാദമുണ്ടായിരിക്കില്ല. അതേസമയം സ്ഥിരം നേതാവിനെ കണ്ടെത്തുന്നതിനുള്ള നടപടികൾ ഉടൻ ആരംഭിക്കാൻ സാധ്യതയില്ലെന്നും സൂചനയുണ്ട്. പോർട്ട് കോക്വിറ്റ്‌ലാം മേയർ ബ്രാഡ് വെസ്റ്റ്, ഈ തിരഞ്ഞെടുപ്പിൽ മത്സരിക്കാതിരുന്ന മുൻ ഭവന മന്ത്രി രവി കാഹ്‌ലോൺ എന്നിവരുടെ പേരുകൾ സാധ്യതാ പട്ടികയിൽ ഉയർന്നു കേൾക്കുന്നുണ്ട്.
