തിരുവനന്തപുരം കോർപ്പറേഷനിലെ സത്യപ്രതിജ്ഞാ തർക്കങ്ങളും കൗൺസിലർമാർ തമ്മിലുണ്ടായ കയ്യാങ്കളിയും നിലവിലെ ഭരണസംവിധാനത്തെ വലിയ പ്രതിസന്ധിയിലാക്കിയിരിക്കുകയാണ്. കോർപ്പറേഷനിൽ പൂർണ്ണമായ ഭരണസ്തംഭനമാണ് നിലനിൽക്കുന്നതെന്ന് ആരോപിച്ച് ഭരണപക്ഷത്തിനെതിരെ അവിശ്വാസ പ്രമേയം കൊണ്ടുവരാനുള്ള ശക്തമായ നീക്കത്തിലാണ് യുഡിഎഫ്. കൗൺസിൽ യോഗങ്ങൾ പോലും കൃത്യമായി വിളിച്ചുചേർക്കാൻ ബിജെപി നേതൃത്വം നൽകുന്ന ഭരണസമിതി തയ്യാറാകുന്നില്ലെന്ന് യുഡിഎഫ് കുറ്റപ്പെടുത്തുന്നു. അവിശ്വാസ പ്രമേയവുമായി മുന്നോട്ട് പോകുന്നതുമായി ബന്ധപ്പെട്ട അന്തിമ തീരുമാനങ്ങൾ കൈക്കൊള്ളാൻ യുഡിഎഫ് പാർലമെന്ററി പാർട്ടി ഇന്ന് വൈകിട്ട് യോഗം ചേരുന്നുണ്ട്.
നിലവിലെ കൗൺസിലിലെ കക്ഷിനില പരിശോധിച്ചാൽ അവിശ്വാസ പ്രമേയം വിജയിപ്പിക്കാൻ യുഡിഎഫിന് ഒറ്റയ്ക്ക് സാധിക്കില്ല. ആകെ 101 അംഗങ്ങളുള്ള കോർപ്പറേഷനിൽ ഒരു സ്വതന്ത്രന്റെ പിന്തുണയോടെയാണ് 50 സീറ്റുകളുള്ള ബിജെപി ഭരണം നടത്തുന്നത്. പ്രതിപക്ഷത്ത് യുഡിഎഫിന് 20 സീറ്റുകളും എൽഡിഎഫിന് 29 സീറ്റുകളുമാണുള്ളത്. ഇവർക്ക് പുറമെ യുഡിഎഫ് വിമതനായി ജയിച്ച ഒരു സ്വതന്ത്രൻ കൂടിയുണ്ട്. നിലവിൽ ബിജെപിയുടെ ഒരു കൗൺസിലർ (ആർ. സുഗതൻ) കാപ്പ കേസിൽപ്പെട്ട് ജയിലിലാണ്. ഈ സാഹചര്യത്തിൽ വരുന്ന 29-ാം തീയതി നടക്കുന്ന കൗൺസിൽ യോഗത്തിൽ യുഡിഎഫും എൽഡിഎഫും ഈ സ്വതന്ത്രനും ഒരുമിച്ച് നിന്നാൽ ഭരണപക്ഷത്തിനെതിരെ കൃത്യം 50 വോട്ടുകൾ തികയ്ക്കാനാകും. അതിനാൽ തന്നെ അവിശ്വാസ നീക്കത്തോട് എൽഡിഎഫ് എന്ത് നിലപാട് സ്വീകരിക്കുമെന്നത് നിർണായകമാണ്.
അതിനിടെ, കൗൺസിലർമാർ തമ്മിലുണ്ടായ സംഘർഷത്തിൽ സിപീഎം-ബിജെപി ജനപ്രതിനിധികൾക്കെതിരെ പോലീസ് രണ്ട് കേസുകൾ രജിസ്റ്റർ ചെയ്തിട്ടുണ്ട്. എൽഡിഎഫ് കൗൺസിലറുടെ പരാതിയിൽ മേയർക്കും ഡെപ്യൂട്ടി മേയർക്കുമെതിരെയും, ബിജെപി കൗൺസിലറുടെ പരാതിയിൽ മുൻ മേയർ ശ്രീകുമാർ അടക്കമുള്ള അഞ്ച് പേർക്കെതിരെയുമാണ് കേസ്. എന്നാൽ കേസിന്റെ എഫ്ഐആറിൽ ഒന്നാം പ്രതിയായ സിപിഎം കൗൺസിലർ എസ്.പി ദീപക്കിന്റെ പേര് ‘ദീപക് ദേവ്’ എന്ന് തെറ്റായി രേഖപ്പെടുത്തിയത് പോലീസിന് വലിയ നാണക്കേടുണ്ടാക്കിയിട്ടുണ്ട്. ഈ പിഴവ് ഉടൻ തിരുത്തുമെന്ന് പോലീസ് അറിയിച്ചിട്ടുണ്ട്.
മറ്റൊരു പ്രധാന സംഭവത്തിൽ, വിഴിഞ്ഞം ഹാർബർ വാർഡിൽ നിർമ്മിച്ച രാജീവ് ഗാന്ധി ആവാസ് യോജന ഫ്ലാറ്റുകൾ നാല് വർഷത്തിനുള്ളിൽ തകർച്ച നേരിട്ടതിനെക്കുറിച്ച് അന്വേഷിക്കാൻ തിരുവനന്തപുരം എൻജിനീയറിങ് കോളേജിനെ ചുമതലപ്പെടുത്തുമെന്ന് മേയർ വി.വി. രാജേഷ് വ്യക്തമാക്കി. കൂടാതെ സ്മാർട്ട് സിറ്റി പദ്ധതികളിലെ ക്രമക്കേടുകൾ കണ്ടെത്താൻ ഫൊറൻസിക് ഓഡിറ്റിങ് നടത്താൻ സർക്കാരിനോട് ആവശ്യപ്പെടുമെന്നും മേയർ കൂട്ടിച്ചേർത്തു.
