കാനഡ: കാനഡയിലെ നോർത്ത് വെസ്റ്റ് ടെറിട്ടറിയിലുള്ള ഫോർട്ട് സിംപ്സൺ കാട്ടുതീ അണയ്ക്കുന്നതിനിടയിൽ വിമാനം തകർന്നു വീണ് മൂന്ന് പേർ മരണപ്പെട്ടു. അപകടത്തെക്കുറിച്ചുള്ള കൂടുതൽ വിവരങ്ങൾ പുറത്തുവരുന്നതേയുള്ളൂ. കാട്ടുതീ അണയ്ക്കുന്ന വലിയൊരു എയർ ടാങ്കർ വിമാനത്തിന് വഴികാട്ടാനായി കൂടെയുണ്ടായിരുന്ന ‘ബേർഡ് ഡോഗ്’ (Bird Dog) വിഭാഗത്തിൽപ്പെട്ട വിമാനമാണ് തകർന്നുവീണതെന്നാണ് പ്രാഥമിക വിവരം. പ്രാദേശിക സമയം ബുധനാഴ്ച രാത്രി, ഫോർട്ട് സിംപ്സണിന് പടിഞ്ഞാറ് ഏകദേശം 50 കിലോമീറ്റർ മാറിയാണ് ഈ ദരുരന്തം സംഭവിച്ചത്.
അപകടത്തിൽ മൂന്ന് പേരുടെ ജീവൻ നഷ്ടപ്പെട്ടതായി എൻ.ഡബ്ല്യു.ടി ഫയർ (NWT Fire) പ്രത്യേക ബുള്ളറ്റിനിലൂടെ സ്ഥിരീകരിച്ചിട്ടുണ്ടെങ്കിലും കൂടുതൽ വിവരങ്ങൾ വെളിപ്പെടുത്തിയിട്ടില്ല. “ഫോർട്ട് സിംപ്സണിന് പടിഞ്ഞാറ് ഭാഗത്തുണ്ടായ ബേർഡ് ഡോഗ് വിമാനാപകടത്തിൽ മൂന്ന് പേർക്ക് ജീവൻ നഷ്ടപ്പെട്ടു എന്ന് അങ്ങേയറ്റത്തെ ദുഃഖത്തോടെ ഞങ്ങൾ സ്ഥിരീകരിക്കുന്നു. രക്ഷാപ്രവർത്തകർ അപകടസ്ഥലത്ത് എത്തിച്ചേരുകയും മരണങ്ങൾ സ്ഥിരീകരിക്കുകയും ചെയ്തിട്ടുണ്ട്. ഈ അപ്രതീക്ഷിത നഷ്ടത്തിൽ തകർന്നിരിക്കുന്ന കുടുംബങ്ങൾ, സുഹൃത്തുക്കൾ, സഹപ്രവർത്തകർ എന്നിവർക്കൊപ്പം ഞങ്ങളുടെ സംഘടനയും പങ്കുചേരുന്നു,” എന്ന് അവർ അറിയിച്ചു. കൂടാതെ, ഈ ദുരന്തത്തിന്റെ പശ്ചാത്തലത്തിൽ ജീവനക്കാർക്ക് മാനസിക പിന്തുണ നൽകാൻ ‘ക്രിട്ടിക്കൽ ഇൻസിഡന്റ് സ്ട്രെസ് മാനേജ്‌മെന്റ് ടീമുകളെ’ വിവിധ ബേസുകളിൽ വിന്യസിച്ചിട്ടുണ്ട്. റോയൽ കനേഡിയൻ മൗണ്ടഡ് പോലീസ് (RCMP), കോറോണർ, ട്രാൻസ്‌പോർട്ടേഷൻ സേഫ്റ്റി ബോർഡ് ഓഫ് കാനഡ എന്നിവർ ചേർന്നായിരിക്കും അപകടത്തെക്കുറിച്ച് അന്വേഷിക്കുക.
യെല്ലോനൈഫ് ആസ്ഥാനമായി പ്രവർത്തിക്കുന്ന ബഫലോ എയർവേയ്‌സ് (Buffalo Airways) തങ്ങളുടെ പൈലറ്റുമാരുടെയും വിമാനത്തിന്റെയും നഷ്ടത്തിൽ സമാനമായ പ്രസ്താവന പുറപ്പെടുവിച്ചിട്ടുണ്ട്. തകർന്നത് ‘ടർബോ കമാൻഡർ 690’ (Turbo Commander 690) വിമാനമാണെന്ന് അവർ സ്ഥിരീകരിച്ചു. “ഫോർട്ട് സിംപ്സണിന് പടിഞ്ഞാറുള്ള കാട്ടുതീ അണയ്ക്കുന്നതിനിടയിൽ ഞങ്ങളുടെ ഏരിയൽ ഫയർ ഫൈറ്റിംഗ് പൈലറ്റുമാരിൽ ഒരാളെ നഷ്ടപ്പെട്ടുവെന്ന് ഭാരമേറിയ ഹൃദയത്തോടെ ഞങ്ങൾ സ്ഥിരീകരിക്കുന്നു. വിമാനത്തിലുണ്ടായിരുന്ന മൂന്ന് അംഗങ്ങളുടെയും മരണം രക്ഷാപ്രവർത്തകർ സ്ഥിരീകരിച്ചിട്ടുണ്ട്,” എന്ന് ബഫലോ എയർവേയ്‌സ് വ്യക്തമാക്കി. കഴിഞ്ഞ 26 വർഷമായി നോർത്ത് വെസ്റ്റ് ടെറിട്ടറിയിൽ അഗ്നിശമന വിമാനങ്ങളുടെ വലിയൊരു നിര തന്നെ ബഫലോ എയർവേയ്‌സ് പ്രവർത്തിപ്പിക്കുന്നുണ്ട്.
കാട്ടുതീ അണയ്ക്കുന്ന ദൗത്യങ്ങളിൽ വലിയ എയർ ടാങ്കർ വിമാനങ്ങൾക്ക് തൊട്ടുമുന്നിലായി പറന്ന് വഴികാട്ടുന്ന വിമാനങ്ങളെയാണ് ‘ബേർഡ് ഡോഗ്’ എന്ന് വിളിക്കുന്നത്. ഇവ ടാങ്കർ വിമാനങ്ങൾക്ക് സുരക്ഷിതമായി സഞ്ചരിക്കാനുള്ള പാതയും തീ കെടുത്താനുള്ള ദ്രാവകം കൃത്യമായ ഉയരത്തിൽ നിന്ന് താഴേക്ക് ഇടാനുള്ള വഴിയും കാണിച്ച് കൊടുക്കുന്നു. ‘FS009’ എന്ന് പേരിട്ടിരിക്കുന്ന കാട്ടുതീ മേഖലയിലാണ് ഈ അപകടം നടന്നതെന്ന് എൻ.ഡബ്ല്യു.ടി ഫയർ അറിയിച്ചു. ഇടിമിന്നൽ മൂലം മാർട്ടൻ ഹിൽസ് പ്രദേശത്തുണ്ടായ ഈ കാട്ടുതീ നിലവിൽ 100 ഹെക്ടറോളം സ്ഥലത്തേക്ക് പടർന്നിട്ടുണ്ട്. തീയണയ്ക്കാനുള്ള ശ്രമങ്ങൾ ഊർജിതമായി തുടരുകയാണെന്നും, തൽക്കാലം ജനവാസ മേഖലകൾക്കോ മറ്റ് അടിസ്ഥാന സൗകര്യങ്ങൾക്കോ ഭീഷണിയില്ലെന്നും അധികൃതർ കൂട്ടിച്ചേർത്തു
