കനേഡിയൻ പൗരന്മാർക്ക് ഉൾപ്പെടെ അബുദാബി വഴി യാത്ര ചെയ്യുന്ന എല്ലാ വിദേശ യാത്രക്കാർക്കും സൗജന്യ മെഡിക്കൽ ട്രാവൽ ഇൻഷുറൻസ് പ്രഖ്യാപിച്ച് ഇതിഹാദ് എയർവേസ് (Etihad Airways). അബുദാബി കൾച്ചർ ആൻഡ് ടൂറിസം വകുപ്പുമായി (DCT Abu Dhabi) ചേർന്നാണ് ഇതിഹാദ് പദ്ധതി നടപ്പിലാക്കുന്നത്. നിലവിലെ യാത്രാ മുന്നറിയിപ്പുകൾ കാരണം കാനഡക്കാർക്ക് സാധാരണ ട്രാവൽ ഇൻഷുറൻസ് ലഭിക്കാൻ ബുദ്ധിമുട്ടുള്ള സാഹചര്യത്തിൽ, ഈ സൗജന്യ ഇൻഷുറൻസ് വലിയൊരു സഹായമാണ്.

ഇൻഷുറൻസിന്‍റെ പ്രധാന വിവരങ്ങൾ

ഓട്ടോമാറ്റിക് എൻറോൾമെൻ്റ് : യു.എ.ഇക്ക് പുറത്തുനിന്ന് ടിക്കറ്റ് എടുക്കുന്ന എല്ലാ യാത്രക്കാർക്കും ഈ ഇൻഷുറൻസ് പരിരക്ഷ ലഭിക്കും. ഇതിനായി പ്രത്യേകം അപേക്ഷിക്കേണ്ടതില്ല.

യാത്രാ കാലയളവ് : 2026 ജൂലൈ മുതൽ ഡിസംബർ വരെ നടത്തുന്ന സർവീസുകൾക്കാണ് ഈ ഇൻഷുറൻസ് ആനുകൂല്യം ലഭിക്കുക.

കാലാവധി : അബുദാബിയിൽ എത്തുന്ന ദിവസം മുതൽ പരമാവധി 15 ദിവസത്തേക്ക് മാത്രമായിരിക്കും ഈ മെഡിക്കൽ ഇൻഷുറൻസ് പരിരക്ഷ ലഭിക്കുക.

സ്റ്റോപ്പ് ഓവർ ആനുകൂല്യം : ലേഓവർ സമയത്ത് അബുദാബി സന്ദർശിക്കാൻ താൽപ്പര്യപ്പെടുന്ന ഇതിഹാദ് സ്റ്റോപ്പ് ഓവർ പ്രോഗ്രാം (Etihad Stopover Programme) ഉപയോഗിക്കുന്ന യാത്രക്കാർക്കും ഈ ഇൻഷുറൻസ് ലഭിക്കും.

ഇൻഷുറൻസ് കമ്പനി : അബുദാബിയിലെ പ്രമുഖ ഇൻഷുറൻസ് കമ്പനിയായ ‘ദ നാഷണൽ ഇൻഷുറൻസ് കമ്പനി – ദാമൻ’ (Daman) ആണ് ഇൻഷുറൻസ് ഒരുക്കുന്നത്.

അർഹത നേടുന്നതിനുള്ള മാനദണ്ഡങ്ങൾ :

• യാത്ര പൂർണ്ണമായും ഇതിഹാദ് എയർവേസ് (Etihad Airways) വിമാനത്തിലായിരിക്കണം.
• ടിക്കറ്റ് ബുക്ക് ചെയ്തതും യാത്ര ആരംഭിക്കുന്നതും യു.എ.ഇക്ക് പുറത്തുനിന്നായിരിക്കണം.
• നിങ്ങളുടെ അവസാന ലക്ഷ്യസ്ഥാനം അല്ലെങ്കിൽ ട്രാൻസിറ്റ് സ്റ്റോപ്പ് അബുദാബി ആയിരിക്കണം.

എമിറേറ്റ്സ് എയർവേസും (Emirates) കാനഡക്കാർ ഉൾപ്പെടെയുള്ള യാത്രികർക്കായി പുതിയ ഇൻഷുറൻസ് പദ്ധതി പ്രഖ്യാപിച്ചിട്ടുണ്ട്. എന്നാൽ ഇതിഹാദിന്‍റെ സൗജന്യ പദ്ധതിയിൽ നിന്നും ഇതിന് വ്യത്യാസങ്ങളുണ്ട്. എമിറേറ്റ്സ് പുതുതായി അവതരിപ്പിച്ച ‘കോംപ്രിഹെൻസീവ് ട്രാവൽ കവർ’ (Comprehensive Travel Cover) എന്ന ഇൻഷുറൻസ് പാക്കേജിന്‍റെ പ്രധാന വിവരങ്ങൾ താഴെ പറയുന്നവയാണ് :

ഇത് പൂർണ്ണമായും സൗജന്യമല്ല (അധിക തുക നൽകണം)

ഇതിഹാദിന്‍റെ ഇൻഷുറൻസ് പൂർണ്ണമായും സൗജന്യമായി ടിക്കറ്റിനൊപ്പം ലഭിക്കുമ്പോൾ, എമിറേറ്റ്സിന്‍റെ ഇൻഷുറൻസ് ടിക്കറ്റ് ബുക്ക് ചെയ്യുമ്പോൾ അധിക തുക നൽകണം. എന്നാൽ നിലവിലെ യാത്രാ വിലക്കുകൾ കാരണം കാനഡയിൽ മറ്റ് ഇൻഷുറൻസുകൾ കിട്ടാത്ത സാഹചര്യത്തിൽ ഇത് വളരെ കുറഞ്ഞ നിരക്കിലാണ് ലഭ്യമാക്കുന്നത്.

യുദ്ധ/സംഘർഷ സാധ്യതകൾക്കും പരിരക്ഷ ലഭിക്കും (Conflict Cover). പ്രദേശിക സംഘർഷങ്ങൾ കാരണം സാധാരണ ഇൻഷുറൻസ് കമ്പനികൾ നൽകാത്ത ‘കോൺഫ്ലിക്റ്റ് കവർ’ എമിറേറ്റ്സ് നൽകുന്നുണ്ട്.

യാത്രയ്ക്കിടയിൽ എന്തെങ്കിലും അടിയന്തിര സാഹചര്യമുണ്ടായാൽ താഴെ പറയുന്ന ആനുകൂല്യങ്ങൾ ഇതിലൂടെ ലഭിക്കും:

മെഡിക്കൽ ചിലവുകൾ : യുദ്ധപ്പകർച്ചയോ സംഘർഷങ്ങളോ മൂലമുണ്ടാകുന്ന അടിയന്തിര മെഡിക്കൽ ചിലവുകൾക്കായി ഏകദേശം 35,306 കനേഡിയൻ ഡോളർ ($25,000 USD) വരെ റീഇംബേഴ്സ്മെന്റ് ലഭിക്കും.
സൗജന്യ യാത്രാ നീട്ടിനൽകൽ: അടിയന്തിര സാഹചര്യങ്ങളിൽ 30 ദിവസം വരെ യാത്രാ കാലാവധി സൗജന്യമായി നീട്ടി നൽകും.

മടക്കയാത്രയ്ക്കുള്ള ഗ്യാരണ്ടി (Return Guarantee)

മേഖലയിലെ വ്യോമപാത തടസ്സപ്പെടുകയോ എമിറേറ്റ്സ് സർവീസുകൾ റദ്ദാക്കുകയോ ചെയ്താൽ, യാത്രക്കാരെ സുരക്ഷിതമായി നാട്ടിലെത്തിക്കാൻ മറ്റ് വിമാനക്കമ്പനികളിൽ (Rival Airlines) എമിറേറ്റ്സ് സ്വന്തം ചിലവിൽ ടിക്കറ്റ് ബുക്ക് ചെയ്തു നൽകും.

മറ്റ് പ്രധാന ആനുകൂല്യങ്ങൾ

ടിക്കറ്റ് ക്യാൻസലേഷൻ പരിരക്ഷ.

ലഗേജ് നഷ്ടപ്പെടുകയോ വൈകുകയോ ചെയ്താൽ നഷ്ടപരിഹാരം.

വിമാനങ്ങൾ തടസ്സപ്പെടുന്ന സാഹചര്യങ്ങളിൽ എയർലൈൻ തന്നെ ഹോട്ടൽ താമസവും മറ്റ് സഹായങ്ങളും ഒരുക്കും.