ലോസ് ഏഞ്ചൽസ്: പ്രശസ്ത അമേരിക്കൻ ഗായകൻ D4vd (ഡേവിഡ് ആന്റണി ബർക്ക്) കൊലപാതകക്കേസിൽ പിടിയിലായി. 14 വയസ്സുകാരിയായ സെലെസ്റ്റെ റിവാസ് ഹെർണാണ്ടസിനെ കൊലപ്പെടുത്തിയെന്ന സംശയത്തിലാണ് 21-കാരനായ ഗായകനെ ലോസ് ഏഞ്ചൽസ് പോലീസ് അറസ്റ്റ് ചെയ്തത്. പെൺകുട്ടിയുടെ അഴുകിയ നിലയിലുള്ള മൃതദേഹം കഴിഞ്ഞ വർഷം സെപ്റ്റംബറിൽ ഗായകന്റെ ഉടമസ്ഥതയിലുള്ള ടെസ്ല കാറിന്റെ മുൻവശത്തെ ഡിക്കിയിൽ നിന്നാണ് കണ്ടെത്തിയത്.
ലോസ് ഏഞ്ചൽസിലെ ഹോളിവുഡ് ഹിൽസിൽ ഉപേക്ഷിച്ച നിലയിൽ കണ്ടെത്തിയ ടെസ്ല കാർ പാർക്കിംഗ് ലംഘനത്തിന് ടൗൺ യാർഡിലേക്ക് മാറ്റിയിരുന്നു. അവിടെ വെച്ച് കാറിനുള്ളിൽ നിന്ന് ദുർഗന്ധം വമിച്ചതിനെത്തുടർന്ന് നടത്തിയ പരിശോധനയിലാണ് മൃതദേഹം കണ്ടെത്തിയത്. മൃതദേഹം ഭാഗികമായി മുറിച്ച നിലയിലായിരുന്നുവെന്നും പ്ലാസ്റ്റിക് ബാഗുകളിലായാണ് സൂക്ഷിച്ചിരുന്നതെന്നും പോലീസ് വെളിപ്പെടുത്തി. 2024 ഏപ്രിൽ മുതൽ കാണാതായ പെൺകുട്ടിയുടേതാണ് ഈ മൃതദേഹമെന്ന് ഡിഎൻഎ പരിശോധനയിലൂടെ സ്ഥിരീകരിക്കുകയായിരുന്നു.
ഗായകനായ D4vd-യും സെലെസ്റ്റെയും തമ്മിൽ നേരത്തെ പരിചയമുണ്ടായിരുന്നുവെന്നും, കാണാതാകുന്ന ദിവസം അവൾ അവനെ കാണാനാണ് പോയതെന്നും കുടുംബം ആരോപിക്കുന്നു. മാസങ്ങൾ നീണ്ട അന്വേഷണത്തിനൊടുവിൽ കഴിഞ്ഞ വ്യാഴാഴ്ചയാണ് ഗായകനെ അറസ്റ്റ് ചെയ്തത്. നിലവിൽ ജാമ്യമില്ലാ വകുപ്പുകൾ പ്രകാരം തടങ്കലിൽ കഴിയുന്ന ഇദ്ദേഹത്തെ തിങ്കളാഴ്ച കോടതിയിൽ ഹാജരാക്കും. എന്നാൽ ആരോപണങ്ങൾ അടിസ്ഥാനരഹിതമാണെന്നും താൻ നിരപരാധിയാണെന്നുമാണ് ഗായകന്റെ അഭിഭാഷകർ വ്യക്തമാക്കുന്നത്. ‘Romantic Homicide’, ‘Here With Me’ തുടങ്ങിയ ഹിറ്റ് ഗാനങ്ങളിലൂടെ ലോകപ്രശസ്തനായ താരമാണ് D4vd.
