ഗ്രീൻലൻഡിനെ ചൊല്ലി അമേരിക്കയും യൂറോപ്യൻ രാജ്യങ്ങളും തമ്മിലുള്ള തർക്കം വ്യാപാരയുദ്ധത്തിലേക്ക് നീങ്ങുന്നു. യൂറോപ്യൻ രാജ്യങ്ങളിൽ നിന്നുള്ള ഉൽപന്നങ്ങൾക്ക് നികുതി വർധിപ്പിക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണിക്കെതിരെ കനത്ത തിരിച്ചടി നൽകാനൊരുങ്ങുകയാണ് യൂറോപ്യൻ യൂണിയൻ. ഏകദേശം 93 ബില്യൺ യൂറോയുടെ (ഏകദേശം 8.5 ലക്ഷം കോടി രൂപ) അമേരിക്കൻ ഉൽപന്നങ്ങൾക്ക് അധിക നികുതി ചുമത്താനാണ് യൂറോപ്പിന്റെ നീക്കം.

തർക്കം ഗ്രീൻലൻഡിനെച്ചൊല്ലി

ഡെന്മാർക്കിന്റെ അധീനതയിലുള്ള സ്വയംഭരണ പ്രദേശമായ ഗ്രീൻലൻഡ് അമേരിക്കയ്ക്ക് വിട്ടുനൽകണമെന്ന ട്രംപിന്റെ ആവശ്യമാണ് പുതിയ പ്രകോപനത്തിന് കാരണം. ഗ്രീൻലൻഡിൽ നാറ്റോ സഖ്യകക്ഷികൾ സൈനികാഭ്യാസത്തിന് തുടക്കം കുറിച്ചതിന് പിന്നാലെയാണ് ട്രംപ് ഭീഷണി മുഴക്കിയത്. ഫെബ്രുവരി ഒന്നുമുതൽ എട്ട് യൂറോപ്യൻ രാജ്യങ്ങളിൽ നിന്നുള്ള ഇറക്കുമതിക്ക് 10 ശതമാനം നികുതി ചുമത്തുമെന്നാണ് ട്രംപിന്റെ പ്രഖ്യാപനം. ജൂണിനുള്ളിൽ ഗ്രീൻലൻഡ് വിഷയത്തിൽ ധാരണയിലെത്തിയില്ലെങ്കിൽ ഇത് 25 ശതമാനമായി ഉയർത്തുമെന്നും അദ്ദേഹം മുന്നറിയിപ്പ് നൽകി. ഡെന്മാർക്ക്, നോർവേ, സ്വീഡൻ, ഫ്രാൻസ്, ജർമ്മനി, ബ്രിട്ടൻ, നെതർലൻഡ്സ്, ഫിൻലൻഡ് എന്നീ രാജ്യങ്ങളെയാണ് ഇത് ബാധിക്കുക.

വിട്ടുകൊടുക്കാതെ യൂറോപ്പ്

അമേരിക്കയുടെ ഭീഷണിക്ക് വഴങ്ങില്ലെന്ന് യൂറോപ്യൻ നേതാക്കൾ വ്യക്തമാക്കി. ട്രംപിന്റെ നിലപാട് അംഗീകരിക്കാനാവില്ലെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ പ്രതികരിച്ചു. ബ്ലാക്മെയിലിംഗിന് തങ്ങളില്ലെന്ന് സ്വീഡനും, ട്രംപിന്റെ നടപടി തെറ്റാണെന്ന് ബ്രിട്ടീഷ് പ്രധാനമന്ത്രി കീർ സ്റ്റാർമറും തുറന്നടിച്ചു. തിരിച്ചടിയുടെ ഭാഗമായി അമേരിക്കൻ നിർമിത ബോയിങ് വിമാനങ്ങൾ, ആഡംബര കാറുകൾ, മദ്യം (ബോർബൺ) എന്നിവയ്ക്ക് കനത്ത നികുതി ഏർപ്പെടുത്താനാണ് ഇയു ആലോചിക്കുന്നത്. കൂടാതെ, യുഎസുമായി നേരത്തെ ഒപ്പിട്ട വ്യാപാര കരാറുകൾ മരവിപ്പിക്കാനും നീക്കമുണ്ട്. വിഷയത്തിൽ ചർച്ച നടത്താൻ യൂറോപ്യൻ യൂണിയൻ ഈ ആഴ്ച അടിയന്തര യോഗം ചേരും.

അമേരിക്കയുടെ നിലപാട്

അതേസമയം, ട്രംപിന്റെ നീക്കത്തെ യുഎസ് ട്രഷറി സെക്രട്ടറി സ്‌കോട്ട് ബെസെന്റ് ന്യായീകരിച്ചു. അമേരിക്ക തന്റെ കരുത്ത് കാട്ടുകയാണെന്നും യൂറോപ്യൻ രാജ്യങ്ങൾ ഒടുവിൽ വഴങ്ങേണ്ടി വരുമെന്നുമാണ് അദ്ദേഹത്തിന്റെ വാദം. അമേരിക്കയുടെ സുരക്ഷാ കവചത്തിന് കീഴിൽ നിൽക്കുന്ന രാജ്യങ്ങൾ സാഹചര്യം മനസ്സിലാക്കുമെന്നും അദ്ദേഹം കൂട്ടിച്ചേർത്തു.

പ്രത്യാഘാതം കഠിനമാകും

ട്രംപ് നികുതി വർധന നടപ്പിലാക്കിയാൽ ജർമ്മനി, സ്വീഡൻ, ഡെന്മാർക്ക് എന്നീ രാജ്യങ്ങളുടെ കയറ്റുമതി പകുതിയോളം കുറയാൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ. വരും ദിവസങ്ങളിൽ അന്താരാഷ്ട്ര തലത്തിൽ ഈ തർക്കം കൂടുതൽ സങ്കീർണ്ണമാകാനാണ് സാധ്യത.