വരാന്ത്യത്തോടെ ന്യൂയോർക്ക് നഗരത്തിൽ കരീബിയൻ ദ്വീപുകൾക്ക് സമാനമായ കടുത്ത ചൂടും ഉയർന്ന ഈർപ്പവും കനത്ത ഇടിമിന്നലോടു കൂടിയ മഴയും അനുഭവപ്പെടുമെന്ന് മുന്നറിയിപ്പ്. കാലാവസ്ഥ വ്യതിയാനത്തെ തുടർന്ന് നഗരത്തിൽ അടിയന്തരാവസ്ഥ പ്രഖ്യാപിച്ചു.
ഉയർന്ന ചൂടും ഈർപ്പവും
അഞ്ച് ബോറോകളിലും (boroughs) വ്യാഴാഴ്ച രാവിലെ 11 മണി മുതൽ ശനിയാഴ്ച രാത്രി 8 മണി വരെ ഹീറ്റ് അഡ്വൈസറി (Heat Advisory) നിലവിലുണ്ട്. അന്തരീക്ഷത്തിലെ ഉയർന്ന ഈർപ്പം കാരണം അനുഭവപ്പെടുന്ന ചൂട് (Real-feel temperature) 100 ഡിഗ്രി ഫാരൻഹീറ്റിന് മുകളിലെത്തുമെന്ന് പ്രവചിക്കപ്പെടുന്നു. ഈ മേഖലയിൽ ഇതുവരെ രേഖപ്പെടുത്തിയിട്ടുള്ളതിൽ വെച്ച് ഏറ്റവും ഉയർന്ന ഈർപ്പ നിലയാണ് നിലവിലുള്ളതെന്ന് അക്യുവെദർ (AccuWeather) സീനിയർ മിറ്റിയോറോളജിസ്റ്റ് ബ്രയാൻ തോംസൺ പറഞ്ഞു. അടുത്ത ഏതാനും ദിവസങ്ങളിൽ പകൽ സമയത്തെ താപനില 90 ഡിഗ്രി ഫാരൻഹീറ്റിനോട് അടുത്തായിരിക്കും. ഉച്ചകഴിഞ്ഞ് അനുഭവപ്പെടുന്ന ചൂട് 100 ഡിഗ്രിക്ക് മുകളിലാകാൻ സാധ്യതയുണ്ട്.
കനത്ത മഴയും മിന്നൽ പ്രളയ സാധ്യതയും
അന്തരീക്ഷത്തിലെ ഉയർന്ന ഈർപ്പം വെള്ളിയാഴ്ച വൈകുന്നേരത്തോടെ ശക്തമായ മഴയ്ക്കും ഇടിമിന്നലിനും കാരണമാകും. ശനിയാഴ്ച ഉച്ചവരെ മഴ തുടരാൻ സാധ്യതയുണ്ട്. ഒരു മണിക്കൂറിൽ 2 ഇഞ്ചിലധികം മഴ പെയ്യാൻ സാധ്യതയുള്ളതിനാൽ താഴ്ന്ന പ്രദേശങ്ങളിലും ഡ്രെയിനേജ് സൗകര്യം കുറഞ്ഞ ഇടങ്ങളിലും മിന്നൽ പ്രളയത്തിന് (Flash flooding) സാധ്യതയുണ്ടെന്ന് നാഷണൽ വെതർ സർവീസ് മുന്നറിയിപ്പ് നൽകി. ഞായറാഴ്ചയോടെ ഈർപ്പമുള്ള അന്തരീക്ഷത്തിന് ശമനമുണ്ടാകുമെന്നും വരണ്ട കാലാവസ്ഥ തിരിച്ചെത്തുമെന്നും പ്രതീക്ഷിക്കുന്നു.
നഗരസഭയുടെ അടിയന്തര നടപടികൾ
മേയർ സോഹ്റാൻ മംദാനിയും ന്യൂയോർക്ക് സിറ്റി എമർജൻസി മാനേജ്മെന്റും ചേർന്ന് ചൂടും വെള്ളപ്പൊക്കവും നേരിടാനുള്ള അടിയന്തര പദ്ധതികൾ ആവിഷ്കരിച്ചു. അഞ്ച് ബോറോകളിലുമായി നൂറുകണക്കിന് കൂളിംഗ് സെന്ററുകൾ തുറന്നു. തെരുവിൽ കഴിയുന്ന ഭവനരഹിതരായ ആളുകളെ കണ്ടെത്തി കൂളിംഗ് സെന്ററുകളിലേക്കും ഷെൽട്ടറുകളിലേക്കും മാറ്റുന്നതിനായി വ്യാഴം, വെള്ളി ദിവസങ്ങളിൽ ‘കോഡ് റെഡ്’ പ്രഖ്യാപിച്ചു. വീടുകളിൽ എയർ കണ്ടീഷണർ ഇല്ലാത്തവർ കൂളിംഗ് സെന്ററുകൾ ഉപയോഗപ്പെടുത്തണമെന്നും, താഴ്ന്ന നിലകളിൽ താമസിക്കുന്നവർ പ്രളയ സാധ്യത മുന്നിൽ കണ്ട് സുരക്ഷിത സ്ഥാനങ്ങളിലേക്ക് മാറണമെന്നും മേയർ സോഹ്റാൻ മംദാനി അഭ്യർത്ഥിച്ചു. മുതിർന്ന പൗരന്മാരുടെ ക്ഷേമം അന്വേഷിക്കാൻ ‘കൂൾ വാനുകൾ’ സജ്ജമാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.
