അതിശക്തമായ മഞ്ഞുവീഴ്ചയെ തുടർന്ന് കാനഡയുടെ ഈസ്റ്റേൺ മേഖലകളിൽ ജനജീവിതം സ്തംഭിച്ചു. ഒൻ്റാരിയോ, ക്യൂബെക്, നോവ സ്കോഷ്യ എന്നിവിടങ്ങളിൽ കാലാവസ്ഥാ വകുപ്പ് ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. മണിക്കൂറിൽ 90 കിലോമീറ്റർ വേഗതയിൽ വീശിയടിക്കുന്ന കാറ്റും കനത്ത മഞ്ഞുവീഴ്ചയും കാരണം റോഡ്-വ്യോമ ഗതാഗതം പൂർണ്ണമായും തടസ്സപ്പെട്ടു. ഓട്ടവ, മോൺട്രിയൽ എന്നിവിടങ്ങളിൽ ഐസ് മഴയെത്തുടർന്ന് റോഡുകളിൽ കനത്ത മഞ്ഞുപാളികൾ രൂപപ്പെട്ടത് അപകടങ്ങൾക്ക് കാരണമാകുന്നുണ്ട്.
കനത്ത കാറ്റിലും മഞ്ഞുവീഴ്ചയിലും മരങ്ങൾ കടപുഴകി വീണതിനെത്തുടർന്ന് ലക്ഷക്കണക്കിന് വീടുകളിൽ വൈദ്യുതി ബന്ധം വിച്ഛേദിക്കപ്പെട്ടു. ഒൻ്റാരിയോയിൽ മാത്രം 60,000-ത്തിലധികം ഉപഭോക്താക്കൾ ഇരുട്ടിലായതായാണ് റിപ്പോർട്ടുകൾ. ടൊറൻ്റോ, ലണ്ടൻ മേഖലകളിൽ അതിശക്തമായ മഞ്ഞുകാറ്റ് (Blizzard) തുടരുന്നതിനാൽ അനാവശ്യ യാത്രകൾ ഒഴിവാക്കണമെന്ന് ഭരണകൂടം കർശന നിർദ്ദേശം നൽകിയിട്ടുണ്ട്. വരും ദിവസങ്ങളിലും മോശം കാലാവസ്ഥ തുടരാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് എൻവയോൺമെൻ്റ് കാനഡ മുന്നറിയിപ്പ് നൽകി. തിങ്കൾ, ചൊവ്വ ദിവസങ്ങളിൽ കൂടി ശീതക്കാറ്റ് തുടരുമെന്നാണ് പ്രതീക്ഷിക്കുന്നത്. അതിനാൽ ഈ വർഷം അവസാനിക്കുന്നത് കഠിനമായ ശൈത്യകാല കാലാവസ്ഥയിലായിരിക്കും.
