മുൻവർഷങ്ങളെ അപേക്ഷിച്ച് ആൽബർട്ടയിൽ ആരോഗ്യമേഖലയിലെ ജീവനക്കാർക്ക് നേരെയുണ്ടാകുന്ന അതിക്രമങ്ങൾ വർധിച്ചതായി റിപ്പോർട്ട്. കഴിഞ്ഞ പത്ത് വർഷത്തിനിടയിലെ ഏറ്റവും ഉയർന്ന നിരക്കിലാണ് നിലവിൽ ആരോഗ്യപ്രവർത്തകർക്കെതിരെയുള്ള ആക്രമണ പരാതികളെന്ന് ആൽബർട്ട വർക്കേഴ്സ് കോമ്പൻസേഷൻ ബോർഡ് പുറത്തുവിട്ട കണക്കുകൾ വ്യക്തമാക്കുന്നു. ജീവനക്കാരുടെ കുറവ്, രോഗികളുടെ നീണ്ട കാത്തിരിപ്പ് സമയം, മാനസിക സമ്മർദ്ദം എന്നിവയാണ് ഈ അതിക്രമങ്ങൾ വർധിക്കാൻ പ്രധാന കാരണമെന്നും റിപ്പോർട്ടിൽ പറയുന്നു. അതേസമയം ഔദ്യോഗികമായി റിപ്പോർട്ട് ചെയ്യപ്പെടുന്ന കണക്കുകളേക്കാൾ ഇരട്ടിയാണ് ജീവനക്കാർ അഭിമുഖീകരിക്കുന്ന വാക്കാലുള്ള അധിക്ഷേപങ്ങളും ഭീഷണികളുമെന്നും യൂണിയൻ പ്രതിനിധികൾ ചൂണ്ടിക്കാണിക്കുന്നു.
ജീവനക്കാരുടെ സുരക്ഷയ്ക്കായി എഡ്മിന്റനിലെ പ്രമുഖ ആശുപത്രികളിൽ വെപ്പൺ ഡിറ്റക്ടറുകൾ സ്ഥാപിക്കുന്നതുൾപ്പെടെയുള്ള കർശന നടപടികൾ അധികൃതർ സ്വീകരിച്ചിട്ടുണ്ട്. എന്നാൽ താൽക്കാലിക സുരക്ഷാ സംവിധാനങ്ങൾക്കപ്പുറം, ജീവനക്കാരുടെ എണ്ണം കൂട്ടുകയും ജോലിസ്ഥലത്തെ സുരക്ഷിതത്വം ഉറപ്പാക്കാൻ കൃത്യമായ നയരൂപീകരണം നടത്തുകയും വേണമെന്നാണ് ആരോഗ്യ മേഖലയിലെ വിദഗ്ധരും ട്രേഡ് യൂണിയനുകളും സർക്കാരിനോട് ആവശ്യപ്പെട്ടു.
