വ്യാപാരയുദ്ധം രൂക്ഷമായ സാഹചര്യത്തിൽ ബ്രിട്ടീഷ് കൊളംബിയയിലുള്ള പൊതു ശൗചാലയത്തിന് മുന്നിൽ യു എസ് പ്രസിഡൻ്റ് ഡൊണാൾഡ് ട്രംപിൻ്റെ പേരുള്ള ബോർഡ് സ്ഥാപിച്ച് അജ്ഞാതരുടെ പ്രതിഷേധം. പ്രശസ്തമായ ‘ഗാലപ്പിംഗ് ഗൂസ് ട്രെയിലിന്’ സമീപമുള്ള ശൗചാലയത്തിന് മുൻപിലാണ് “ഡൊണാൾഡ് ജെ. ട്രംപ് മെമ്മോറിയൽ” എന്ന് എഴുതിയ ബോർഡ് പ്രത്യക്ഷപ്പെട്ടത്.
വിക്ടോറിയ മുനിസിപ്പൽ അധികൃതർ ബോർഡ് അഴിച്ചുമാറ്റി. സംഭവസ്ഥലത്ത് സിസിടിവി ക്യാമറകൾ ഇല്ലാത്തതിനാൽ ആരാണ് ബോർഡ് സ്ഥാപിച്ചതെന്ന് കണ്ടെത്താനായിട്ടില്ലെന്ന് വിക്ടോറിയ സിറ്റി വക്താവ് വ്യക്തമാക്കി. അമേരിക്ക-കാനഡ വ്യാപാര തർക്കങ്ങൾക്കിടെ ട്രംപിനെതിരെയുള്ള ഇത്തരത്തിലുള്ള പ്രതിഷേധങ്ങൾ വാൻകൂവറിൽ ആദ്യമല്ല. കഴിഞ്ഞ വേനൽക്കാലത്ത് ഇവിടുത്തെ ഒരു പ്രാദേശിക കലാകാരി കുതിരച്ചാണകം ഉപയോഗിച്ച് ട്രംപിൻ്റെ ചിത്രം വരയ്ക്കുകയും അത് 1,800 ഡോളറിന് വിറ്റുപോകുകയും ചെയ്തിരുന്നു.
