ഓണം റിലീസായി തിയറ്ററുകളിലെത്തിയ, നിവിൻ പോളിയും മമിത ബൈജുവും പ്രധാന വേഷങ്ങളിലെത്തിയ ‘ബെത്ലഹേം കുടുംബ യൂണിറ്റ്’ ഇൻഡസ്ട്രി ഹിറ്റിലേക്ക് കുതിക്കുകയാണ്. വളരെ കുറഞ്ഞ ദിവസങ്ങൾക്കുള്ളിൽ ആഗോളതലത്തിൽ 300 കോടി ക്ലബ്ബിലേക്ക് ചിത്രം അടുത്തുകൊണ്ടിരിക്കുകയാണ്. മലയാളത്തിന് പുറമെ തമിഴ്, തെലുങ്ക് പതിപ്പുകൾക്കും മറ്റ് സംസ്ഥാനങ്ങളിൽ നിന്നും വിദേശത്തു നിന്നും മികച്ച പ്രതികരണമാണ് ചിത്രത്തിന് ലഭിക്കുന്നത്. ഇത് നിവിൻ പോളിയുടെ കരിയറിലെ ഏറ്റവും വലിയ വിജയ ചിത്രമായി മാറിയിരിക്കുകയാണ്. പ്രേക്ഷകരിൽ നിന്ന് ലഭിച്ച വലിയ വിജയത്തിന് പിന്നാലെ ‘Encore’ എന്ന പേരിൽ ചിത്രത്തിന്റെ രണ്ടാം ട്രെയ്ലറും അണിയറപ്രവർത്തകർ പുറത്തുവിട്ടിട്ടുണ്ട്. ജസ്റ്റിൻ ചേട്ടായിയായുള്ള നിവിൻ പോളിയുടെയും ആഷ്ലിയായെത്തിയ മമിത ബൈജുവിന്റെയും കോമഡി ട്രാക്കുകളും കെമിസ്ട്രിയുമാണ് ട്രെയ്ലറിലെ പ്രധാന ആകർഷണം.
ഗിരീഷ് എ.ഡി. സംവിധാനം ചെയ്ത ഈ ചിത്രം ഭാവന സ്റ്റുഡിയോസിന്റെ ബാനറിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്നാണ് നിർമ്മിച്ചിരിക്കുന്നത്. തിയറ്ററുകളിൽ ഇനിയും കുടുംബ പ്രേക്ഷകരുടെയും യുവാക്കളുടെയും വലിയ തിരക്കാണ് ചിത്രത്തിന് അനുഭവപ്പെടുന്നത്. സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, ശ്രീന്ദ, പാർവതി അയ്യപ്പദാസ്, മീനാക്ഷി രവീന്ദ്രൻ തുടങ്ങിയ വലിയൊരു താരനിരയും ചിത്രത്തിലുണ്ട്. അജ്മൽ സാബു ഛായാഗ്രഹണവും വിഷ്ണു വിജയ് സംഗീത സംവിധാനവും നിർവഹിച്ചിരിക്കുന്ന ചിത്രത്തിന്റെ എഡിറ്റർ ആകാശ് ജോസഫ് വർഗ്ഗീസാണ്.
