ഈ സാമ്പത്തിക വർഷത്തെ രണ്ടാമത്തെയും 2026-ലെ അവസാനത്തെയും ‘കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റ്’ (CGEB) ഒക്ടോബർ 5 തിങ്കളാഴ്ച മുതൽ വിതരണം ചെയ്യും. നിലവിലുണ്ടായിരുന്ന ‘ജിഎസ്ടി ക്രെഡിറ്റ്’ (GST credit) സംവിധാനത്തിന് പകരമായാണ് ഈ ആനുകൂല്യം ഈ വർഷം ജൂലൈയിൽ ഫെഡറൽ സർക്കാർ അവതരിപ്പിച്ചത്. വിലക്കയറ്റത്തിൽ ബുദ്ധിമുട്ടുന്ന സാധാരണക്കാരായ ദശലക്ഷക്കണക്കിന് പൗരന്മാരെ സഹായിക്കുക എന്ന ലക്ഷ്യത്തോടെയാണ് മാർക്ക് കാർണിയുടെ നേതൃത്വത്തിലുള്ള ലിബറൽ സർക്കാർ ‘കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റ്’ പദ്ധതി പ്രഖ്യാപിച്ചത്. 1.2 കോടിയിലധികം പൗരന്മാർക്കാണ് ഈ സാമ്പത്തിക സഹായം ലഭിക്കുക.
നികുതി ബാധകമല്ലാത്ത ഈ തുക ത്രൈമാസ അടിസ്ഥാനത്തിൽ ‘കാനഡ റവന്യൂ ഏജൻസി’ (CRA) ആണ് വിതരണം ചെയ്യുന്നത്. ജിഎസ്ടി ക്രെഡിറ്റിന്‍റെ 50 ശതമാനത്തിന് തുല്യമായ തുകയാണ് ലഭിക്കുക. അർഹതയനുസരിച്ച് 267 ഡോളർ മുതൽ 533 ഡോളർ വരെ ഒറ്റത്തവണയായി അക്കൗണ്ടിലെത്തും. പണം ലഭിക്കാനായി പ്രത്യേകം അപേക്ഷിക്കേണ്ടതില്ല. 2024-ലെ നികുതി റിട്ടേണുകൾ കൃത്യമായി ഫയൽ ചെയ്തവർക്ക് തുക നേരിട്ട് ബാങ്ക് അക്കൗണ്ടിലെത്തും. അതേസമയം തട്ടിപ്പുകൾക്കെതിരെ ജാഗ്രത പാലിക്കണമെന്നും ഔദ്യോഗിക വിവരങ്ങൾക്കായി മാത്രം സിആർഎ (CRA) വെബ്സൈറ്റ് സന്ദർശിക്കണമെന്നും അധികൃതർ അറിയിച്ചു.
