രണ്ടാം ശനിയാഴ്ചത്തെ അവധി ദിനത്തിൽ കൊച്ചി നഗരം സമാനതകളില്ലാത്ത ഗതാഗതക്കുരുക്കിൽ അമർന്നു. കളമശ്ശേരി, ഇടപ്പള്ളി, പാലാരിവട്ടം, വൈറ്റില, കടവന്ത്ര തുടങ്ങിയ നഗരത്തിലെ പ്രധാന കവലകളെല്ലാം വൻ വാഹനത്തിരക്കിന് സാക്ഷ്യം വഹിച്ചു. അവധി ദിവസമായതിനാൽ ആളുകൾ ഷോപ്പിങ്ങിനായി ഇറങ്ങിയതും, നഗരത്തിലെ ചില റോഡുകളുടെ തകർച്ചയുമാണ് സ്ഥിതി ഇത്രയും വഷളാക്കിയത്. കടവന്ത്രയിലുണ്ടായ ബ്ലോക്ക് കലൂർ റോഡിലേക്കും പടർന്നു. രാവിലെ തുടങ്ങിയ ഈ യാത്രാദുരിതം വൈകിട്ട് വരെ നീണ്ടുനിന്നു. ഓഫീസുകളിലേക്ക് പോയവരും അടിയന്തര ആവശ്യങ്ങൾക്കായി ഇറങ്ങിയവരും വഴിയിൽ കുടുങ്ങിപ്പോയി. രോഗികളുമായി വന്ന ആംബുലൻസുകൾക്ക് പോലും കടന്നുപോകാൻ കഴിയാത്ത വിധം ദയനീയമായ അവസ്ഥയാണ് നഗരത്തിൽ ഉടനീളം കാണാൻ കഴിഞ്ഞത്. ഇടപ്പള്ളി, പാലാരിവട്ടം, വൈറ്റില തുടങ്ങിയ ഭാഗങ്ങളിലെല്ലാം റോഡുകൾ വാഹനങ്ങളെക്കൊണ്ട് നിറഞ്ഞു കവിഞ്ഞു.
വൈറ്റിലയിൽ നിന്നും ഇടപ്പള്ളിയിലേക്ക് എത്തുവാൻ മാത്രം ഒരു മണിക്കൂറിലധികം സമയമാണ് വേണ്ടി വന്നത്. പാലാരിവട്ടം ഫ്ലൈഓവറിന് മുകളിൽ പോലും മണിക്കൂറുകളോളം വാഹനങ്ങൾക്ക് ഒരടി മുന്നോട്ട് നീങ്ങാൻ സാധിച്ചില്ല. നഗരത്തിന്റെ പല ഭാഗങ്ങളിലും കിലോമീറ്ററുകളോളം നീളത്തിലാണ് വാഹനങ്ങളുടെ വലിയ ക്യൂ രൂപപ്പെട്ടത്. ഈ കുരുക്ക് കാക്കനാട് ഭാഗത്തേക്കും വ്യാപിപ്പിച്ചു. വാഴക്കാല മുതൽ പാലാരിവട്ടം ബൈപാസ് വരെയുള്ള റോഡിൽ വാഹനങ്ങൾ അങ്ങേയറ്റം ഇഴഞ്ഞാണ് നീങ്ങിയത്.
ഡിജിറ്റൽ മാപ്പുകളിൽ നഗരത്തിലെ പ്രധാന പാതകളെല്ലാം കടുംചുവപ്പ് നിറത്തിൽ (Heavy Traffic) കാണിച്ചതോടെ, മറ്റ് ബദൽ വഴികൾ കണ്ടെത്താനാകാതെ യാത്രക്കാർ പൂർണ്ണമായും പ്രതിസന്ധിയിലായി. ഈ കനത്ത ഗതാഗതക്കുരുക്ക് ഓൺലൈൻ ടാക്സി സർവീസുകളെയും വല്ലാതെ ബാധിച്ചു. വെറും 3 കിലോമീറ്റർ സഞ്ചരിക്കാൻ 30 മിനിറ്റിലധികം സമയം എടുക്കേണ്ടി വന്ന സാഹചര്യത്തിൽ, ടാക്സി ഡ്രൈവർമാർ പല ട്രിപ്പുകളും റദ്ദാക്കാൻ നിർബന്ധിതരായി. പ്രത്യേകിച്ച് ഇടപ്പള്ളി, വൈറ്റില ഭാഗങ്ങളിലേക്കുള്ള യാത്രകൾ ഏറ്റെടുക്കാൻ ഡ്രൈവർമാർ വിമുഖത കാണിച്ചു. റോഡുകൾ ബ്ലോക്കായതോടെ ആളുകൾ കൂട്ടത്തോടെ മെട്രോയെ ആശ്രയിച്ചതിനാൽ കൊച്ചി മെട്രോ സർവീസുകളിലും സാധാരണ ദിവസങ്ങളേക്കാൾ വലിയ തിരക്കാണ് അനുഭവപ്പെട്ടത്.
