ക്യൂബെക്ക് നഗരമായ മോൺട്രിയലിൽ സ്‌കൂളിന് നേരെ ഭീകരാക്രമണം നടത്താൻ പദ്ധതിയിട്ട പ്രായപൂർത്തിയാകാത്ത കൗമാരക്കാരനെ റോയൽ കനേഡിയൻ മൗണ്ടഡ് പോലീസ് അറസ്റ്റ് ചെയ്തു. അമേരിക്കൻ രഹസ്യാന്വേഷണ ഏജൻസിയായ എഫ്.ബി.ഐ നൽകിയ വിവരത്തിൻ്റെ അടിസ്ഥാനത്തിൽ ആഴ്ചകൾ നീണ്ട അന്വേഷണത്തിനൊടുവിലാണ് അറസ്റ്റ്. ദേശീയ സുരക്ഷ ഉറപ്പാക്കുന്ന സംയുക്ത അന്വേഷണ സംഘമാണ് (INSET) ഇയാളെ കസ്റ്റഡിയിലെടുത്തത്. ഇയാളെ ചോദ്യം ചെയ്തുവരികയാണെന്നും ഇലക്ട്രോണിക് ഉപകരണങ്ങൾക്കായി വസതിയിൽ തിരച്ചിൽ തുടരുകയാണെന്നും പോലീസ് പറഞ്ഞു.
ആക്രമണ ആസൂത്രണത്തിനായി ഇയാൾ ആർട്ടിഫിഷ്യൽ ഇൻ്റലിജൻസ് ഉപയോഗിച്ചതായാണ് സൂചന. കൂടാതെ, ടെലിഗ്രാം പ്ലാറ്റ്‌ഫോമിലൂടെ മുസ്‌ലിംകൾ, ഹെയ്തിയൻ സമൂഹം, എൽ.ജി.ബി.ടി.ക്യു+ വിഭാഗങ്ങൾ എന്നിവരെ ലക്ഷ്യമിട്ട് ഭീഷണി സന്ദേശങ്ങൾ പ്രചരിപ്പിച്ചതായും പോലീസ് വക്താവ് എൻസൈൻ എറിക് ഗാസ് അറിയിച്ചു.
