വിനിപെഗ് : പ്രത്യേക നറുക്കെടുപ്പിലൂടെ പ്രവിശ്യാ നോമിനേഷനായി അപേക്ഷിക്കാൻ മാനിറ്റോബ പ്രൊവിൻഷ്യൽ നോമിനി പ്രോഗ്രാം വഴി 1,050 യുക്രെയ്ൻ പൗരന്മാർക്ക് ഇൻവിറ്റേഷൻ ലഭിച്ചു. നവംബർ 19-ന് നടന്ന നറുക്കെടുപ്പിൽ ആകെ പ്രവിശ്യാ നോമിനേഷനായി അപേക്ഷിക്കാനുള്ള 1,116 ‘ലെറ്റേഴ്സ് ഓഫ് അഡ്വൈസ് ടു അപ്ലൈ’ (LAAs) നൽകിയിട്ടുണ്ട്. നിലവിൽ മാനിറ്റോബയിൽ ജോലി ചെയ്യുന്ന 1,050 യുക്രെയ്ൻ പൗരന്മാർക്കും ബാക്കിയുള്ള 66 പേർക്ക് പ്രത്യേക റിക്രൂട്ട്മെൻ്റ് പദ്ധതിയുടെ (Strategic Recruitment Initiative) ഭാഗമായി MPNP നേരിട്ടുമാണ് ഇൻവിറ്റേഷൻ നൽകിയത്.
ഇൻവിറ്റേഷൻ ലഭിച്ച ഉദ്യോഗാർത്ഥികൾക്ക് പ്രവിശ്യാ നോമിനേഷനായി അപേക്ഷ സമർപ്പിക്കാൻ 60 ദിവസത്തെ സമയം ലഭിക്കും. അപേക്ഷ അംഗീകരിക്കപ്പെട്ടാൽ, അവർക്ക് കാനഡയിലെ സ്ഥിര താമസത്തിനായുള്ള (Permanent Residence – PR) അപേക്ഷ സമർപ്പിക്കാവുന്നതാണ്. MPNP നോമിനേഷൻ ലഭിക്കുന്ന ഉദ്യോഗാർത്ഥികൾക്ക്, ഫെഡറൽ വർക്ക് പെർമിറ്റ് അപേക്ഷയിൽ സമർപ്പിക്കുന്നതിനായി പ്രൊവിൻഷ്യൽ വർക്ക് പെർമിറ്റ് സപ്പോർട്ട് ലെറ്റർ (provincial work permit support letter) ആവശ്യപ്പെടാം. സ്ഥിര താമസത്തിനായുള്ള (PR) അപേക്ഷ സമർപ്പിച്ച ശേഷം, നോമിനേഷൻ ലഭിച്ചവർക്ക് ‘ബ്രിഡ്ജിങ് ഓപ്പൺ വർക്ക് പെർമിറ്റിന്’ (bridging open work permit) അർഹതയുണ്ട്.








