കാനഡയിലെ ഏറ്റവും അപകടകരമായ നഗരം ബ്രിട്ടീഷ് കൊളംബിയയിലെ സറെ ആണെന്ന് പുതിയ റിപ്പോർട്ട്. രാജ്യത്ത് കുറ്റകൃത്യ നിരക്ക് ഏറ്റവും കൂടുതലുള്ള നഗരം സറെ ആണെന്ന് ഓസ്ട്രേലിയൻ ഗവേഷണ സ്ഥാപനമായ ‘കംപെയർ ദി മാർക്കറ്റ്’ പുറത്തുവിട്ട ഏറ്റവും പുതിയ റിപ്പോർട്ടിൽ പറയുന്നു. അൽബർട്ടയിലെ ലെത്ബ്രിഡ്ജ്, റെഡ് ഡിയർ എന്നിവയാണ് തൊട്ടുപിന്നിലുള്ളത്. ഒൻ്റാരിയോയിലെ സഡ്ബറിയാണ് ഏറ്റവും കൂടുതൽ കുറ്റകൃത്യ നിരക്കുള്ള മറ്റൊരു നഗരം. 2019-ന് ശേഷം കുറ്റകൃത്യങ്ങളിൽ വലിയ വർധനവുണ്ടായ ലോക നഗരങ്ങളിൽ ബ്രിട്ടീഷ് കൊളംബിയയിലെ കെലോന എട്ടാം സ്ഥാനത്തെത്തി.
അതേ സമയം കാനഡയിലെ ഏറ്റവും സുരക്ഷിതമായ നഗരമായി തിരഞ്ഞെടുക്കപ്പെട്ടത് ക്യുബെക് സിറ്റിയാണ്. ഒൻ്റാരിയോയിലെ ഓക്വിൽ, മാർക്കം എന്നിവയാണ് രണ്ടും മൂന്നും സ്ഥാനങ്ങളിൽ. പ്രമുഖ നഗരമായ ടൊറൻ്റോ രാജ്യത്തെ സുരക്ഷിത നഗരങ്ങളുടെ പട്ടികയിൽ 12-ാം സ്ഥാനത്താണ്. അതേസമയം ലോകത്ത് കുറ്റകൃത്യ നിരക്ക് ഏറ്റവും കൂടുതലുള്ള അപകടകരമായ നഗരം ദക്ഷിണാഫ്രിക്കയിലെ പീറ്റർമാരിറ്റ്സ്ബർഗ് ആണ്. പട്ടികയിലെ ആദ്യ പത്ത് നഗരങ്ങളിൽ അഞ്ചെണ്ണവും ദക്ഷിണാഫ്രിക്കയിലാണ്. പ്രിട്ടോറിയ (ദക്ഷിണാഫ്രിക്ക), കാരക്കാസ് (വെനിസ്വേല) എന്നിവയാണ് രണ്ടും മൂന്നും സ്ഥാനങ്ങളിൽ.
