ഭൂമിയെ ചുട്ടുപൊള്ളിക്കുന്ന ആഗോളതാപനവും എൽനിനോ പ്രതിഭാസവും സമുദ്ര താപനിലയിലെ വർദ്ധനവും ഒന്നിച്ചെത്തിയതോടെ യൂറോപ്യൻ രാജ്യങ്ങൾ സമാനതകളില്ലാത്ത ചൂടാണ് നേരിടുന്നത്. നിലവിലെ റിപ്പോർട്ടുകൾ പ്രകാരം ഉഷ്ണതരംഗത്തെ തുടർന്ന് ആയിരത്തി മുന്നൂറിലധികം ആളുകൾക്ക് ഇതിനകം ജീവൻ നഷ്ടമായിക്കഴിഞ്ഞു. അന്തരീക്ഷത്തിന് മുകളിൽ നിവർത്തിപ്പിടിച്ച കുട പോലെ ചൂട് തങ്ങിനിൽക്കുന്ന ‘ഹീറ്റ് ഡോം’ പ്രതിഭാസമാണ് സ്ഥിതിഗതികൾ ഇത്രത്തോളം വഷളാക്കുന്നതെന്ന് ശാസ്ത്രലോകം വിലയിരുത്തുന്നു. അസഹനീയമായ ഈ ചൂടിൽ നിന്നും താൽക്കാലിക ആശ്വാസം കണ്ടെത്താനായി നദികളിലും തടാകങ്ങളിലും കടൽത്തീരങ്ങളിലും അഭയം തേടുകയാണ് ഭൂരിഭാഗം ജനങ്ങളും.
യൂറോപ്പിലെ പ്രധാന രാജ്യങ്ങളായ യുകെ, ഫ്രാൻസ്, ജർമ്മനി, സ്പെയിൻ എന്നിവിടങ്ങളിൽ പലയിടത്തും താപനില 40 ഡിഗ്രി സെൽഷ്യസ് രേഖപ്പെടുത്തി. ഇതിൽ ഫ്രാൻസിൽ കഴിഞ്ഞ ദിവസം രേഖപ്പെടുത്തിയ 43 ഡിഗ്രിയും, യുകെയിൽ ജൂൺ മാസത്തിലുണ്ടായ 36.1 ഡിഗ്രിയും സർവ്വകാല റെക്കോർഡുകളാണ്. അന്താരാഷ്ട്ര കാലാവസ്ഥാ ഗവേഷണ സംഘടനയായ ക്ലൈമറ്റ് സെൻട്രലിന്റെ പഠനരേഖകൾ വ്യക്തമാക്കുന്നത് 1970-കളെ അപേക്ഷിച്ച് നോക്കുമ്പോൾ ലോകമെമ്പാടും കഠിനമായ ചൂട് അനുഭവപ്പെടുന്ന ദിവസങ്ങളുടെ എണ്ണത്തിൽ ഇരട്ടി വർദ്ധനവാണ് ഉണ്ടായിട്ടുള്ളതെന്നാണ്.
വരും ദിവസങ്ങളിൽ യൂറോപ്പിലും അമേരിക്കയിലും ജനജീവിതം കൂടുതൽ ദുഷ്കരമാകുമെന്നാണ് പുതിയ മുന്നറിയിപ്പുകൾ നൽകുന്ന സൂചന. മുൻപ് ശരാശരി 10 ദിവസങ്ങൾ മാത്രം നീണ്ടുനിന്നിരുന്ന ഉഷ്ണതരംഗം ഇപ്പോൾ 23 ദിവസത്തോളം നീളുന്ന അവസ്ഥയിലേക്ക് മാറിയിരിക്കുന്നു. നിലവിൽ തെക്കേ അമേരിക്ക, ദക്ഷിണ-പടിഞ്ഞാറൻ യു.എസ്, ആഫ്രിക്ക, ഓസ്ട്രേലിയ, ഗൾഫ് മേഖലകൾ, തെക്കുകിഴക്കൻ ഏഷ്യ എന്നീ പ്രദേശങ്ങളെല്ലാം തന്നെ ഈ ആഗോള ഉഷ്ണതരംഗത്തിന്റെ പിടിയിലാണ്.
അത്യുഷ്ണത്തിന്റെ ദാരുണമായ അനന്തരഫലമായി സൈപ്രസിൽ കാറിനുള്ളിൽ കുടുങ്ങിപ്പോയ എട്ടും പത്തും വയസ്സുള്ള രണ്ട് ബൾഗേറിയൻ കുട്ടികൾ മരണപ്പെട്ട നിലയിൽ കണ്ടെത്തുകയുണ്ടായി. സമാനമായ രീതിയിൽ പോളണ്ടിൽ നടന്ന ബൈക്ക് മാരത്തൺ മത്സരത്തിൽ പങ്കെടുത്ത മുപ്പതും എഴുപത്തൊന്നും വയസ്സുള്ള രണ്ട് സൈക്ലിസ്റ്റുകളും കടുത്ത ചൂട് താങ്ങാനാവാതെ കുഴഞ്ഞുവീണ് മരണത്തിന് കീഴടങ്ങി.
