മാനസികസമ്മർദ്ദവും വിഷാദരോഗവും കാരണം ജീവിതം മടുത്തുവെന്ന് വ്യക്തമാക്കുന്ന വീഡിയോ സമൂഹമാധ്യമങ്ങളിൽ പങ്കുവെച്ച ശേഷം അധ്യാപകൻ റെയിൽവേ ട്രാക്കിൽ ചാടി ജീവനൊടുക്കി. നഗരൂർ വെള്ളല്ലൂർ സ്വദേശിയും ഏവിയേഷൻ ട്രെയിനറുമായ ജോഷ്മിൻ (36) ആണ് ഇന്നലെ രാത്രി ചിറയിൻകീഴിൽ ട്രെയിൻ തട്ടി മരിച്ചത്. മഞ്ചാടിമൂട് റെയിൽവേ ഗേറ്റിനു സമീപം രാത്രി എട്ടുമണിയോടെയായിരുന്നു സംഭവം.
വാഹനം ഗേറ്റിനടുത്ത് നിർത്തിയിട്ട ശേഷം ഇയാൾ ട്രാക്കിലേക്ക് നടന്നു കയറുകയായിരുന്നുവെന്ന് പോലീസ് വ്യക്തമാക്കി. മരണത്തിന് തൊട്ടുമുൻപ് താൻ അനുഭവിക്കുന്ന മാനസിക വിഷമങ്ങളെക്കുറിച്ച് വിശദീകരിക്കുന്ന വീഡിയോ ജോഷ്മിൻ സോഷ്യൽ മീഡിയയിൽ പോസ്റ്റ് ചെയ്തിരുന്നതായി സുഹൃത്തുക്കൾ മൊഴി നൽകിയിട്ടുണ്ട്. അവിവാഹിതനായ ഇയാൾ കഴക്കൂട്ടം കുളത്തൂരിലെ വാടകവീട്ടിൽ ഒറ്റയ്ക്കായിരുന്നു താമസം.
