നൂറിലധികം പേർക്ക് സാൽമൊണെല്ല രോഗം ബാധിച്ചതോടെ ഇറാനിൽ നിന്നുള്ള പിസ്തയുടെയും പിസ്ത അടങ്ങിയ ഉൽപ്പന്നങ്ങളുടെയും ഇറക്കുമതി താൽക്കാലികമായി നിർത്തിവെച്ച് കനേഡിയൻ ഫുഡ് ഇൻസ്പെക്ഷൻ ഏജൻസി (CFIA). പിസ്തയും പിസ്ത അടങ്ങിയ ഉൽപ്പന്നങ്ങളും കാനഡയിലേക്ക് ഇറക്കുമതി ചെയ്യുന്ന എല്ലാ കമ്പനികളും അവരുടെ ഉൽപ്പന്നങ്ങൾ ഇറാനിൽ നിന്നുള്ളതല്ലെന്ന് തെളിവ് നൽകണമെന്ന് ഏജൻസി അറിയിച്ചു. ഇറക്കുമതി ചെയ്യുന്ന കമ്പനികൾ തെളിവ് നൽകിയില്ലെങ്കിൽ, സാൽമൊണെല്ല ഉണ്ടോ എന്നറിയാൻ പരിശോധനയ്ക്ക് വിധേയമാക്കുകയോ പ്രവേശനം നിഷേധിക്കുകയോ ചെയ്യുമെന്നും ഏജൻസി പറയുന്നു. ഇറക്കുമതി ഫെഡറൽ മാനദണ്ഡങ്ങൾക്ക് അനുസരിച്ച് അല്ലെങ്കിൽ പിഴ ചുമത്തുകയോ കമ്പനികളുടെ ലൈസൻസ് സസ്പെൻഡ് ചെയ്യുകയോ റദ്ദാക്കുകയോ ചെയ്യും.
കാനഡയിൽ ഇതുവരെ 105 പേർക്ക് സാൽമൊണെല്ല ബാധിച്ചതായി പബ്ലിക് ഹെൽത്ത് ഏജൻസി ഓഫ് കാനഡ (PHAC) റിപ്പോർട്ട് ചെയ്തു. 16 പേരെ ആശുപത്രിയിൽ പ്രവേശിപ്പിച്ചതായി PHAC പറയുന്നു. ഐസ്ക്രീം, ചോക്ലേറ്റ്, ബക്ലാവ, പിസ്ത പരിപ്പ് തുടങ്ങിയ വിവിധ ഉൽപ്പന്നങ്ങളിൽ സാൽമൊണെല്ല ബാധയുണ്ടെന്ന് സംശയിക്കുന്നതായി ഏജൻസി പറഞ്ഞു. സ്ഥിരീകരിച്ച കേസുകൾക്കപ്പുറം നിരവധി ആളുകൾക്ക് സാൽമൊണെല്ല ബാധിച്ചിട്ടുണ്ടാകാമെന്നും പൊതുജനാരോഗ്യ ഏജൻസി പറയുന്നു.
