‘എൽ നിനോ’ പ്രതിഭാസത്തെ തുടർന്ന് കാനഡയിൽ ശൈത്യകാലത്തും വസന്തകാലത്തും സാധാരണയേക്കാൾ ഉയർന്ന താപനില അനുഭവപ്പെടുമെന്ന് കാലാവസ്ഥാ നിരീക്ഷണ വകുപ്പ് റിപ്പോർട്ട് ചെയ്തു. പസഫിക് സമുദ്രത്തിലെ ഉപരിതല താപനില സാധാരണയേക്കാൾ ക്രമാതീതമായി ഉയരുന്ന പ്രതിഭാസമാണ് എൽ നിനോ (El Niño). കാനഡയുടെ പരമ്പരാഗതമായ കഠിന ശൈത്യത്തിനും അതിശക്തമായ മഞ്ഞുവീഴ്ചയ്ക്കും ഇത്തവണ ഇടിവുണ്ടാകുമെന്നും റിപ്പോർട്ടിൽ പറയുന്നു.
പടിഞ്ഞാറൻ കാനഡയിലും ആൽബർട്ട ഉൾപ്പെടെയുള്ള പ്രധാന പ്രവിശ്യകളിലും അന്തരീക്ഷ താപനിലയിൽ പ്രകടമായ വർധന രേഖപ്പെടുത്താൻ സാധ്യതയുണ്ട്. ശൈത്യകാലത്തിന്റെ ദൈർഘ്യം കുറയുന്നതിനൊപ്പം വസന്തകാലം നേരത്തെ ആരംഭിക്കാനും ഈ പ്രതിഭാസം കാരണമാകും. കുറഞ്ഞ മഞ്ഞുവീഴ്ച ഗതാഗതത്തിനും ദൈനംദിന ജോലികൾക്കും താൽക്കാലിക ആശ്വാസം നൽകുമെങ്കിലും, പ്രകൃതിദത്ത മഞ്ഞുപാളികളുടെ അളവിലുണ്ടാകുന്ന കുറവ് പാരിസ്ഥിതിക സന്തുലിതാവസ്ഥയെ ബാധിച്ചേക്കാം.
മഞ്ഞുവീഴ്ചയിലുണ്ടാകുന്ന കുറവ് വസന്തകാലത്തിന്റെ അവസാനത്തോടെ കടുത്ത വരൾച്ചയ്ക്കും കുടിവെള്ള ലഭ്യതക്കുറവിനും വഴിവെച്ചേക്കാമെന്ന് പരിസ്ഥിതി മേഖലയിലെ വിദഗ്ധർ മുന്നറിയിപ്പ് നൽകുന്നു. കൂടാതെ വരണ്ട കാലാവസ്ഥ വനാതിർത്തികളിൽ കാട്ടുതീ പടർന്നുപിടിക്കാനുള്ള സാധ്യത വർധിപ്പിക്കും. ഈ സാഹചര്യത്തിൽ, എൽ നിനോ പ്രതിഭാസം മൂലമുണ്ടാകാവുന്ന പ്രകൃതിദത്ത വെല്ലുവിളികളെ നേരിടാൻ തയ്യാറെടുപ്പുകൾ നടത്തുകയാണ് കാനഡയിലെ ഫെഡറൽ-പ്രവിശ്യാ സർക്കാരുകൾ.
