പൂക്കളവും സദ്യയും, സാംസ്‌കാരിക പരിപാടികളുമായി ഓണാഘോഷത്തിനായി ഒരുക്കങ്ങൾ ആരംഭിച്ച് മലയാളീ അസോസിയേഷൻ ഓഫ് ഗ്രേറ്റർ ഫിലാഡല്‍ഫിയ (മാപ്പ്). മഹാബലിയുടെ സ്മരണ പുതുക്കി ഐക്യത്തിന്‍റെയും സമൃദ്ധിയുടെയും സന്ദേശമായി മാപ്പ് ഓണത്തെ വരവേല്‍ക്കാന്‍ തയാറെടുക്കുകയാണ്. ഓണാഘോഷ പരിപാടികളുടെ നടത്തിപ്പിനും ഏകോപനത്തിനുമായി വിവിധ കലാസാംസ്‌കാരിക പരിപാടികള്‍ കോഡിനേറ്റ് ചെയ്യാന്‍ സാബു സക്കറിയയുടെയും ഓണസദ്യയുടെ ഒരുക്കങ്ങള്‍ ക്രമീകരിച്ച് ലിബിന്‍ പുന്നശ്ശേരിയുടെയും നേതൃനിര സജീവമാണ്. ഓഗസ്റ്റ് 15 ശനിയാഴ്ച ഉച്ചകഴിഞ്ഞ് മൂന്ന് മണിക്ക് ഫിലാഡല്‍ഫിയ സീറോ മലബാർ ചർച്ച് ഓഡിറ്റോറിയത്തിലാണ് ഓണാഘോഷങ്ങൾ ഒരുക്കിയിരിക്കുന്നത്.
രാഷ്ട്രീയ സിനിമാരംഗത്തെ വിശിഷ്ടാതിഥികള്‍ പങ്കെടുക്കുന്ന ഈ ഓണാഘോഷത്തിലേക്ക് എല്ലാവരെയും ക്ഷണിക്കുന്നതായി മാപ്പ് പ്രസിഡൻ്റ് കൊച്ചുമോന്‍ വയലത്ത് അറിയിച്ചു . സിംഗിള്‍ ടിക്കറ്റ് 30 ഡോളര്‍, ഫാമിലി ടിക്കറ്റ് രണ്ട് അഡള്‍ട്ട്, രണ്ട് കിഡ്‌സ് 60 ഡോളര്‍ എന്ന നിരക്കില്‍ ടിക്കറ്റുകള്‍ ലഭ്യമാണ്.
