ആഭ്യന്തര ഉൽപ്പന്നങ്ങളെ പ്രോത്സാഹിപ്പിക്കാനുള്ള ‘Buy Canadian’ പദ്ധതിക്ക് കാനഡയിൽ തുടക്കമായി. ഇത് രാജ്യത്തുടനീളം പുതിയ തൊഴിലവസരങ്ങൾ സൃഷ്ടിക്കുമെന്നും കനേഡിയൻ വിതരണ ശൃംഖലയെ കൂടുതൽ ശക്തമാക്കുമെന്നും പ്രൊക്യുർമെന്റ് മന്ത്രി ജോയൽ ലൈറ്റ്ബൗണ്ട് അറിയിച്ചു. രാജ്യത്തെ വ്യവസായങ്ങളെ സംരക്ഷിക്കുന്നതിനായി, സർക്കാർ നടത്തുന്ന വൻകിട പദ്ധതികൾ, പ്രതിരോധ ഇടപാടുകൾ, നിർമ്മാണ ജോലികൾ എന്നിവയിൽ കനേഡിയൻ ഉൽപ്പന്നങ്ങൾക്കും തൊഴിലാളികൾക്കും മുൻഗണന നൽകുക എന്നതാണ് പദ്ധതിയുടെ ലക്ഷ്യം. യുഎസ് വ്യാപാര യുദ്ധം മൂലം പ്രതിസന്ധിയിലായ കനേഡിയൻ വ്യവസായങ്ങൾക്ക് ഇത് പിന്തുണ നൽകും.
‘Buy Canadian’ പദ്ധതിയുടെ ആദ്യ പടിയായി, 2.5 കോടി ഡോളറോ അതിൽ കൂടുതലോ മൂല്യമുള്ള കരാറുകളിൽ കനേഡിയൻ കമ്പനികൾക്കും ഉൽപ്പന്നങ്ങൾക്കും മുൻഗണന നൽകണം. കൂടാതെ, കുറഞ്ഞത് 2.5 ലക്ഷം ഡോളർ മൂല്യമുള്ള നിർമ്മാണ-പ്രതിരോധ പ്രോജക്റ്റുകളിൽ കാനഡയിൽ നിർമ്മിച്ച സ്റ്റീൽ, അലുമിനിയം, മരം ഉൽപ്പന്നങ്ങൾ എന്നിവ ഉപയോഗിക്കണം. അടുത്ത വസന്തകാലത്തോടെ നയം 50 ലക്ഷം ഡോളറിൽ കൂടുതലുള്ള എല്ലാ കരാറുകളിലേക്കും വ്യാപിപ്പിക്കാൻ സാധ്യതയുണ്ട്.
