കേരളം ഉൾപ്പെടെയുള്ള വിവിധ സംസ്ഥാനങ്ങളിൽ ലഭ്യമാകുന്ന പഴങ്ങളിലും പച്ചക്കറികളിലും അപകടകരമായ രീതിയിൽ കീടനാശിനി അവശിഷ്ടങ്ങൾ അടങ്ങിയിട്ടുണ്ടെന്ന് കേന്ദ്ര കൃഷിമന്ത്രാലയത്തിന്റെ പരിശോധനയിൽ വ്യക്തമായി. കാർഷിക ഉൽപ്പന്നങ്ങളിൽ ഉണ്ടായിരിക്കേണ്ട കീടനാശിനിയുടെ പരമാവധി അളവ് ഒരു കിലോഗ്രാമിന് 0.1 മില്ലിഗ്രാം ആയി ഭക്ഷ്യ സുരക്ഷാ അതോറിറ്റി (FSSAI) പരിമിതപ്പെടുത്തിയിട്ടുണ്ട്. എന്നാൽ, 2023 മുതൽ 2026 വരെയുള്ള കാലയളവിൽ 23 സംസ്ഥാനങ്ങളിൽ നിന്നായി പരിശോധിച്ച 70,652 സാമ്പിളുകളിൽ 2,223 എണ്ണത്തിലും കീടനാശിനിയുടെ സാന്നിധ്യം നിശ്ചിത പരിധിക്കും മുകളിലാണെന്ന് കണ്ടെത്തി. കേരളത്തിൽ നിന്ന് ശേഖരിച്ച 4,130 സാമ്പിളുകളിൽ 81 എണ്ണത്തിൽ വിഷാംശം ഉയർന്ന അളവിലായിരുന്നു.
കേരളത്തിലേക്ക് പ്രധാനമായും പഴങ്ങളും പച്ചക്കറികളും ഇറക്കുമതി ചെയ്യുന്ന തമിഴ്നാട്ടിൽ നിന്നുള്ള 3,601 സാമ്പിളുകളിൽ 81 എണ്ണത്തിലും കീടനാശിനി അളവ് കൂടുതലായിരുന്നു. കർണാടക, തെലങ്കാന, മഹാരാഷ്ട്ര, ഹരിയാന എന്നീ സംസ്ഥാനങ്ങളിൽ നിന്നുള്ള ഉൽപ്പന്നങ്ങളിലും വിഷാംശത്തിന്റെ അളവ് ഉയർന്ന നിലയിലാണ്. എന്നാൽ ഛത്തീസ്ഗഡ്, ഝാർഖണ്ഡ്, ഒഡീഷ എന്നീ സംസ്ഥാനങ്ങളിലെ സാമ്പിളുകളിൽ കീടനാശിനിയുടെ സാന്നിധ്യം തീരെയില്ല എന്നത് ആശ്വാസകരമാണ്. സംസ്ഥാനത്തെ ലാബുകളിൽ നടത്തിയ പരിശോധനയിൽ 1,262 ഭക്ഷ്യ സാമ്പിളുകളിൽ 58 എണ്ണത്തിൽ അമിതമായ വിഷാംശം രേഖപ്പെടുത്തിയതായി കൃഷിമന്ത്രി ടി. സിദ്ദീഖും വ്യക്തമാക്കിയിട്ടുണ്ട്.
പഴം-പച്ചക്കറികളിലെ കീടനാശിനി ഭീഷണിക്ക് പുറമേ വിപണിയിലെ ഗുണനിലവാരമില്ലാത്ത വിത്തുകളുടെ വിൽപനയും വലിയ പ്രതിസന്ധിയുയർത്തുന്നുണ്ട്. കഴിഞ്ഞ നാല് വർഷത്തിനിടെ പരിശോധിച്ച 8,09,033 വിത്ത് സാമ്പിളുകളിൽ 3,33,532 എണ്ണവും നിശ്ചിത നിലവാരം പുലർത്താത്തവയാണെന്ന് കണ്ടെത്തി. തുടർന്ന് 17,551 വിത്തുകളുടെ വിൽപന നിരോധിക്കുകയും 1,566 ഉൽപാദകർക്ക് മുന്നറിയിപ്പ് നൽകുകയും ചെയ്തു. തീർത്തും മോശം ഗുണനിലവാരമുള്ള വിത്തുകൾ വിപണിയിലിറക്കിയ 286 നിർമ്മാതാക്കൾക്കെതിരെ നിയമനടപടികൾ സ്വീകരിച്ചിട്ടുണ്ടെന്നും മന്ത്രാലയം അറിയിച്ചു.
