മലങ്കര ഓർത്തഡോക്സ് ക്രിസ്ത്യന്‍ സൊസൈറ്റിയുടെ (MOCS) രണ്ടാമത് കാര്‍ണിവല്‍ സെപ്റ്റംബര്‍ 12-ന് ശനിയാഴ്ച രാവിലെ 11 മണിക്ക് ആരംഭിക്കും. ബെന്‍സന്‍വില്ലയിലെ സേക്രട്ട് ഹാര്‍ട്ട് ക്‌നാനായ പള്ളി അങ്കണത്തില്‍ നടക്കുന്ന കാര്‍ണിവല്‍ പരിപാടികള്‍ കേരള ആഭ്യന്തര മന്ത്രി രമേശ് ചെന്നിത്തല ഉദ്ഘാടനം ചെയ്യും. കാർണിവലിൽ കലാപരിപാടികള്‍, ഗാനമേള, വിവിധയിനം നൃത്തരൂപങ്ങള്‍, ഫേസ് പെയിൻ്റിങ്, മെഹന്തി തുടങ്ങി വിവിധയിനം കലാരൂപങ്ങള്‍ ഒരുക്കിയിട്ടുണ്ട്. കുട്ടികള്‍ക്കായി ബാസ്‌കറ്റ് ബോള്‍, റോക്ക് ക്ലൈംബിങ്, മറ്റ് വിനോദോപാധികള്‍ എന്നിവയും ഉള്‍പ്പെടുത്തിയിട്ടുണ്ട്. വൈവിധ്യമാര്‍ന്ന ഭക്ഷണപദാര്‍ത്ഥങ്ങള്‍ രുചിക്കാനും, കുട്ടികള്‍ക്കും മുതിര്‍ന്നവര്‍ക്കും തങ്ങളുടെ കലാവാസനകള്‍ പ്രകടിപ്പിക്കാനുമുള്ള വേദികളും സജ്ജമാക്കിയിട്ടുണ്ട്.

രാവിലെ 11 മണിക്ക് ആരംഭിക്കുന്ന ഈ ‘കലാരുചിക്കൂട്ട്’ സംഗമവേദി വൈകുന്നേരം 7 മണിക്ക് അവസാനിക്കും. എല്ലാവരും ഈ ‘കലാ-കായിക രുചിക്കൂട്ട്’ സംഗമത്തിൽ പങ്കെടുത്ത് വിജയിപ്പിക്കണമെന്ന് പ്രസിഡൻ്റ് ഡോ. ബിനു ഫിലിപ്പ്, സെക്രട്ടറി അജിത്ത് ഏലിയാസ്, ട്രഷറര്‍ ഫിലിപ്പ് കുന്നേല്‍, ജനറല്‍ കണ്‍വീനര്‍ ഏബ്രഹാം വര്‍ക്കി (അനി), ട്രസ്റ്റി ബോര്‍ഡ് ചെയര്‍മാന്‍ ഡോ. ജോസഫ് ഏബ്രഹാം എന്നിവരും കമ്മിറ്റി അംഗങ്ങളായ ഏലിയാസ് തോമസ്, ജിജി ജോണ്‍, ഏലിയാമ്മ പുന്നൂസ്, ആല്‍ബിന്‍ ഏബ്രഹാം, സിബില്‍ ഫിലിപ്പ്, ലിഷാ ജോണി എന്നിവർ അഭ്യർത്ഥിച്ചു.