ഇൻസ്റ്റഗ്രാം, ഫെയ്സ്ബുക്ക് തുടങ്ങിയ ജനപ്രിയ സോഷ്യൽ മീഡിയ പ്ലാറ്റ്ഫോമുകൾ വഴി കുട്ടികൾ നേരിടുന്ന മാനസികവും ശാരീരികവുമായ ബുദ്ധിമുട്ടുകൾക്ക് കമ്പനികൾ മറുപടി പറയേണ്ടി വരുമെന്ന ഘട്ടത്തിലാണ് പുതിയ നീക്കങ്ങളുമായി മെറ്റ രംഗത്തെത്തിയിരിക്കുന്നത്. ഇത്തരം പ്ലാറ്റ്ഫോമുകൾ കാരണം പ്രായപൂർത്തിയാകാത്തവർക്ക് ഉണ്ടാകുന്ന ആഘാതങ്ങളുമായി ബന്ധപ്പെട്ട നിയമപരമായ ബാധ്യതകളിൽ നിന്നും നിലവിലുള്ള കേസുകളിൽ നിന്നും പൂർണ്ണമായ പരിരക്ഷ ഉറപ്പാക്കാൻ മാർക്ക് സക്കർബർഗിന്റെ മെറ്റ യുഎസ് കോൺഗ്രസിൽ ശക്തമായ സമ്മർദ്ദം ചെലുത്തുകയാണ്. കുട്ടികളുടെയും അവരുടെ കുടുംബങ്ങളുടെയും ഭാഗത്തുനിന്ന് കമ്പനി ഇപ്പോൾ നേരിട്ടുകൊണ്ടിരിക്കുന്ന ആയിരക്കണക്കിന് നിയമനടപടികളിൽ നിന്ന് എങ്ങനെയെങ്കിലും രക്ഷപ്പെടാനുള്ള മുൻകൂർ ശ്രമമായാണ് റോയിട്ടേഴ്സ് പുറത്തുവിട്ട നിർദ്ദിഷ്ട നിയമനിർമാണ രേഖകൾ വ്യക്തമാക്കുന്നത്.

നിലവിൽ യുഎസ് സെനറ്റിന്റെ പരിഗണനയിലുള്ള ‘കിഡ്സ് ഓൺലൈൻ സേഫ്റ്റി ആക്ട്’ (KOSA) എന്ന ബില്ലിനെ മറയാക്കിയാണ് മെറ്റ ഈ തന്ത്രം മെനയുന്നത്. പതിനെട്ട് വയസ്സിന് താഴെയുള്ള കുട്ടികളുടെ ഓൺലൈൻ സുരക്ഷയും സ്വകാര്യതയും മുൻനിർത്തി വിവിധ സ്റ്റേറ്റുകൾ നിർമ്മിച്ചിട്ടുള്ള കർശനമായ നിയമങ്ങളെയും അതുവഴി വരാവുന്ന വലിയ സാമ്പത്തിക നഷ്ടപരിഹാര ക്ലെയിമുകളെയും അസാധുവാക്കാനാണ് കമ്പനി ശ്രമിക്കുന്നത്. തങ്ങൾ നിർദേശിക്കുന്ന ഈ നിയമപരിരക്ഷാ ക്ലോസ് പുതിയ ബില്ലിൽ ഉൾപ്പെടുത്തിയാൽ, അതുവരെ ബില്ലിനോട് കാട്ടിയിരുന്ന ശക്തമായ എതിർപ്പ് പിൻവലിക്കാമെന്ന വാഗ്ദാനവും മെറ്റ മുന്നോട്ടുവെക്കുന്നുണ്ട്. 1990-കൾക്ക് ശേഷം യുഎസിൽ ഓൺലൈൻ പ്ലാറ്റ്ഫോമുകളെ നിയന്ത്രിക്കാൻ നടക്കുന്ന ഏറ്റവും വലിയ നിയമനിർമാണ ശ്രമത്തിനിടയിലാണ് തങ്ങൾക്ക് അനുകൂലമായി നിയമം മാറ്റാൻ ടെക് ഭീമന്മാർ സമ്മർദ്ദം ചെലുത്തുന്നത്.

ഡെമോക്രാറ്റിക് സെനറ്റർ റിച്ചാർഡ് ബ്ലൂമെന്താലും റിപ്പബ്ലിക്കൻ സെനറ്റർ മാർഷാ ബ്ലാക്ക്ബേണും സംയുക്തമായി കൊണ്ടുവന്ന കെഒഎസ്എ (KOSA) ബിൽ, സോഷ്യൽ മീഡിയയുടെ അമിത ഉപയോഗം, ഇൻഫിനിറ്റ് സ്ക്രോളിങ്, ആക്റ്റിവിറ്റി നോട്ടിഫിക്കേഷനുകൾ, കുട്ടികളെ വഴിതെറ്റിക്കുന്ന ഫോട്ടോ ഫിൽട്ടറുകൾ എന്നിവയിൽ നിന്ന് പ്രായപൂർത്തിയാകാത്തവരെ സംരക്ഷിക്കാൻ കമ്പനികളെ നിർബന്ധിതരാക്കുന്ന ഒന്നാണ്. ഈ വർഷം ആദ്യം കാലിഫോർണിയയിൽ ഒരു അമ്മ നടത്തിയ നിയമപോരാട്ടത്തിൽ മെറ്റയും യൂട്യൂബും പരാജയപ്പെടുകയും 60 ലക്ഷം ഡോളർ ഇരയായ കുടുംബത്തിന് കോടതി വിധി പ്രകാരം നൽകേണ്ടി വരികയും ചെയ്തിരുന്നു. ഈ തിരിച്ചടിയെത്തുടർന്നാണ് നിയമത്തിൽ ലൂപ്ഹോളുകൾ ഉണ്ടാക്കാൻ കമ്പനി ശ്രമിക്കുന്നതെങ്കിലും, മെറ്റയുടെ ഇത്തരം ഒരു നിർദേശം തങ്ങളുടെ ശ്രദ്ധയിൽപ്പെട്ടിട്ടില്ലെന്നും അത് ഒരിക്കലും അംഗീകരിക്കില്ലെന്നും ബില്ലിന്റെ സ്പോൺസറായ സെനറ്റർ മാർഷാ ബ്ലാക്ക്ബേണിന്റെ വക്താവ് വ്യക്തമാക്കിയിട്ടുണ്ട്.