വിക്ടോറിയ: കാനഡയിലെ ബ്രിട്ടീഷ് കൊളംബിയയിൽ പ്രസവചികിത്സാ മേഖല (Maternity Care) കടുത്ത പ്രതിസന്ധിയിലേക്ക്. ജീവനക്കാരുടെ അഭാവം മൂലം പ്രവിശ്യയിലെ പ്രമുഖ ആശുപത്രികളിലെ മെറ്റേണിറ്റി യൂണിറ്റുകൾ തുടർച്ചയായി അടച്ചുപൂട്ടേണ്ടി വരുന്നത് ഗർഭിണികൾക്കിടയിൽ വലിയ ആശങ്കയുണ്ടാക്കുന്നു. വൈറ്റ് റോക്കിലെ പീസ് ആർച്ച് ഹോസ്പിറ്റലിലെ പ്രസവചികിത്സാ വിഭാഗം ഈ വർഷം മാത്രം നാലാം തവണയാണ് താൽക്കാലികമായി അടച്ചുപൂട്ടിയത്.
ജീവനക്കാർ അപ്രതീക്ഷിതമായി ജോലി ഒഴിഞ്ഞുപോയതിനെത്തുടർന്ന് നാല് ദിവസത്തേക്കാണ് ഇത്തവണ പീസ് ആർച്ച് ഹോസ്പിറ്റലിലെ യൂണിറ്റ് അടച്ചത്. ഇതേത്തുടർന്ന് ഇവിടെ ചികിത്സയിലായിരുന്ന ഗർഭിണികളെ കിലോമീറ്ററുകൾ അകലെയുള്ള മറ്റ് ആശുപത്രികളിലേക്ക് മാറ്റേണ്ടി വന്നു. പീസ് ആർച്ച് ഹോസ്പിറ്റലിന് പുറമെ റിഡ്ജ് മെഡോസ് ഹോസ്പിറ്റലിലും സമാനമായ രീതിയിൽ സേവനങ്ങൾ തടസ്സപ്പെടുന്ന സാഹചര്യം ഉണ്ടായിട്ടുണ്ട്.
ഇതൊരു പ്രാദേശിക പ്രശ്നമല്ലെന്നും പ്രവിശ്യയിലുടനീളമുള്ള ഗുരുതരമായ അവസ്ഥയാണെന്നും ‘ഡോക്ടേഴ്സ് ഓഫ് ബിസി’ (Doctors of BC) വ്യക്തമാക്കി. ഗൈനക്കോളജിസ്റ്റുകൾ, മിഡ്വൈഫുമാർ, നഴ്സുമാർ എന്നിവരുടെ എണ്ണത്തിലുള്ള വലിയ കുറവാണ് ഈ പ്രതിസന്ധിക്ക് കാരണം. മുൻകാലങ്ങളിൽ ഫാമിലി ഡോക്ടർമാർ പ്രസവചികിത്സയിൽ സജീവമായി ഇടപെട്ടിരുന്നുവെങ്കിൽ ഇപ്പോൾ അത്തരക്കാരുടെ എണ്ണവും കുറയുകയാണ്. ജനസംഖ്യ വർദ്ധിക്കുന്നതിന് അനുസരിച്ച് പുതിയ ഡോക്ടർമാരുടെ എണ്ണത്തിൽ വർദ്ധനവ് ഉണ്ടാകാത്തത് ആരോഗ്യരംഗത്തെ സമ്മർദ്ദം ഇരട്ടിയാക്കുന്നു.
നിലവിലെ ആരോഗ്യ സംവിധാനം കടുത്ത സമ്മർദ്ദത്തിലാണെന്നും അടിയന്തര പരിഹാരങ്ങൾ ആവശ്യമാണെന്നും ഡോക്ടേഴ്സ് ഓഫ് ബിസി പ്രസിഡന്റ് ഡോ. ആദം തോംസൺ മുന്നറിയിപ്പ് നൽകി. പുതിയ ഡോക്ടർമാരെ നിയമിക്കുന്നതിനൊപ്പം നിലവിലുള്ളവർ ജോലി ഉപേക്ഷിച്ചു പോകാതിരിക്കാനുള്ള നടപടികൾ സർക്കാർ സ്വീകരിക്കണമെന്നും അദ്ദേഹം ആവശ്യപ്പെട്ടു. പ്രശ്നപരിഹാരത്തിനായി ആറ് പുതിയ ഗൈനക്കോളജിസ്റ്റുകളെ നിയമിച്ചിട്ടുണ്ടെന്ന് ഫ്രേസർ ഹെൽത്ത് അറിയിച്ചെങ്കിലും, ദീർഘകാലാടിസ്ഥാനത്തിലുള്ള മാറ്റങ്ങൾ ഉണ്ടായെങ്കിൽ മാത്രമേ ഈ പ്രതിസന്ധി പരിഹരിക്കാൻ സാധിക്കൂ എന്നാണ് വിദഗ്ധരുടെ പക്ഷം.
