ദുർഹം : ഒൻ്റാരിയോയിലെ ദുർഹം മേഖലയിൽ അഞ്ചാംപനി അണുബാധ സ്ഥിരീകരിച്ചതായി ദുർഹം റീജനൽ ആരോഗ്യ ഉദ്യോഗസ്ഥർ മുന്നറിയിപ്പ് നൽകി. വിദേശത്തുനിന്നും തിരിച്ചെത്തിയ വാക്സിനേഷൻ എടുക്കാത്ത കുട്ടിയ്ക്കാണ് അഞ്ചാംപനി (Measles) സ്ഥിരീകരിച്ചത്. നവംബർ 3-ന് രാവിലെ 7:30-ന് പിയേഴ്സൺ അന്താരാഷ്ട്ര വിമാനത്താവളത്തിലെ ടെർമിനൽ 1-ൽ എത്തിയ ‘എത്യോപ്യൻ എയർലൈൻസ്’ വിമാനം ET552-ലാണ് കുട്ടി യാത്ര ചെയ്തത്. ഈ വിമാനത്തിൽ യാത്ര ചെയ്തവർ, നവംബർ 24 വരെ അഞ്ചാംപനി ലക്ഷണങ്ങൾ ശ്രദ്ധിക്കണമെന്നും ആരോഗ്യവകുപ്പ് നിർദ്ദേശിച്ചു. കൂടാതെ, നവംബർ 3-ന് രാവിലെ 10:40-നും വൈകുന്നേരം 5 മണിക്കും ഇടയിൽ ‘ലേക്കറിഡ്ജ് ഹെൽത്ത് അജാക്സ്-പിക്കറിങ്’ (Lakeridge Health Ajax-Pickering) ആശുപത്രിയിലെ എമർജൻസി വിഭാഗം വെയിറ്റിങ് റൂമിൽ ഉണ്ടായിരുന്നവരും രോഗലക്ഷണങ്ങൾ പരിശോധിക്കണം.
രോഗാണുബാധയുണ്ടായി 7 മുതൽ 21 ദിവസങ്ങൾക്കുള്ളിൽ രോഗലക്ഷണങ്ങൾ കണ്ടുതുടങ്ങാം. കടുത്ത പനി, ചുമ, മൂക്കൊലിപ്പ്, കണ്ണുകൾ ചുവന്ന് വെള്ളം വരിക എന്നിവയാണ് പ്രധാന ലക്ഷണങ്ങൾ. മറ്റ് ലക്ഷണങ്ങൾ തുടങ്ങി 3 മുതൽ 7 ദിവസങ്ങൾക്കുള്ളിൽ ശരീരത്തിൽ ചുവന്ന പാടുകൾ (rash) പ്രത്യക്ഷപ്പെടാം. അഞ്ചാംപനി ബാധിച്ചവരുമായി സമ്പർക്കത്തിൽ വന്നവർ, തങ്ങൾക്ക് വാക്സിനേഷൻ പൂർണ്ണമായും ലഭിച്ചിട്ടുണ്ടോ എന്ന് ഉറപ്പുവരുത്തണമെന്നും ആരോഗ്യ വകുപ്പ് അഭ്യർത്ഥിച്ചു.
