യുഎസിലെ മിസോറിയിലുള്ള സെന്റ് പീറ്റേഴ്സിൽ നിർത്തിയിട്ടിരുന്ന കാർ കുളത്തിലേക്ക് മറിഞ്ഞ് മൂന്നു വയസ്സുകാരി അപകടത്തിൽപെട്ടെങ്കിലും നാട്ടുകാരുടെ സമയോചിതമായ ഇടപെടലിൽ കുട്ടി അത്ഭുതകരമായി രക്ഷപ്പെട്ടു. മേഗൻ കോൾഹാസ് എന്ന യുവതി തന്റെ മറ്റു മൂന്ന് മക്കളെ സ്കൂൾ ബസ കയറ്റിവിടാനായി പോയ സമയത്താണ് നാടകീയ സംഭവങ്ങൾ അരങ്ങേറിയത്. ജിഎംസി യുകോൺ കാറിനുള്ളിൽ ഒറ്റയ്ക്കായിരുന്ന മൂന്നുവയസ്സുകാരി അബദ്ധത്തിൽ ഗിയർ മാറ്റിയതാണ് വാഹനം കുളത്തിലേക്ക് നീങ്ങി മറിയാൻ ഇടയാക്കിയതെന്നാണ് പോലീസിന്റെ പ്രാഥമിക നിഗമനം.
കാർ വെള്ളത്തിലേക്ക് പതിക്കുന്നത് കണ്ട് അമ്മയും കുട്ടികളും നിലവിളിച്ചെങ്കിലും വാഹനം അതിവേഗം മുങ്ങിത്താഴുകയായിരുന്നു. അമ്മയുടെയും മക്കളുടെയും അലറിവിളി കേട്ട് ഓടിയെത്തിയ പ്രദേശവാസികൾ, കാർ പൂർണ്ണമായി വെള്ളത്തിനടിയിലാകുന്നതിന് തൊട്ടുമുമ്പ് ജനൽച്ചില്ലുകൾ തകർത്ത് കുട്ടിയെ സുരക്ഷിതമായി പുറത്തെടുത്തു. നോക്കിനിൽക്കെ വാഹനം മുങ്ങിത്താണുപോയെങ്കിലും നാട്ടുകാരുടെ മിന്നൽ രക്ഷാപ്രവർത്തനം കുട്ടിയുടെ ജീവൻ തിരികെ നൽകുകയായിരുന്നു.
രക്ഷപ്പെടുത്തിയ കുട്ടിയെ തുടർപരിശോധനകൾക്കായി ഉടൻതന്നെ ആശുപത്രിയിൽ പ്രവേശിപ്പിച്ചു. അപകടത്തിനിടയിൽ മേഗന്റെ കാലിന് പരിക്കേറ്റിട്ടുണ്ട്. സമയത്തിന് ഇടപെട്ട് മകളുടെ ജീവൻ രക്ഷിച്ച നാട്ടുകാർക്ക് മേഗനും കുടുംബവും നന്ദി രേഖപ്പെടുത്തി. സംഭവത്തിൽ പ്രാദേശിക പോലീസ് കൂടുതൽ അന്വേഷണം നടത്തിവരികയാണ്.
