ശരീരഭാരം കുറയ്ക്കാനുള്ള ‘വെഗോവി’ക്ക് (Wegovy) പകരം ആദ്യ ജനറിക് കുത്തിവെപ്പിന് ഹെൽത്ത് കാനഡയുടെ അംഗീകാരം. കനേഡിയൻ ഫാർമസ്യൂട്ടിക്കൽ കമ്പനിയായ ‘അപ്പോടെക്സ്’ (Apotex) വികസിപ്പിച്ച ‘സ്വെമിയ’ (Svemia) എന്ന സെമാഗ്ലൂട്ടൈഡ് കുത്തിവെപ്പിനാണ് ഹെൽത്ത് കാനഡയുടെ അംഗീകാരം ലഭിച്ചത്. അമിതവണ്ണവും ശരീരഭാരവും നിയന്ത്രിക്കുന്നതിനായി കാനഡയിൽ അംഗീകാരം ലഭിക്കുന്ന ആദ്യ ജനറിക് സെമാഗ്ലൂട്ടൈഡ് മരുന്നാണിത്. സുരക്ഷ, ഫലപ്രാപ്തി, ഗുണനിലവാരം എന്നിവ ഉറപ്പുവരുത്തുന്നതിനുള്ള എല്ലാ മാനദണ്ഡങ്ങളും സ്വെമിയ പാലിക്കുന്നുണ്ടെന്ന് ഹെൽത്ത് കാനഡ വ്യക്തമാക്കി.
12 വയസ്സും അതിനുമുകളിലും പ്രായമുള്ളവരിലെ അമിതവണ്ണവും ശരീരഭാരവും നിയന്ത്രിക്കുന്നതിനായി ആഴ്ചയിലൊരിക്കൽ കുത്തിവെപ്പ് സ്വീകരിക്കാനാണ് അനുമതി. അതേസമയം ഭക്ഷണക്രമത്തിനും ശാരീരിക വ്യായാമങ്ങൾക്കും ഒപ്പം അനുബന്ധ ചികിത്സയായി മാത്രമേ ‘സ്വെമിയ’ (Svemia) ഉപയോഗിക്കാവൂ എന്നും നിർദ്ദേശമുണ്ട്.
