കനേഡിയൻ ഡെൻ്റൽ കെയർ പ്ലാനിൻ്റെ അടുത്ത വർഷത്തേക്കുള്ള (2026-2027) പുതിയ അപേക്ഷകൾ ജൂൺ 2 മുതൽ സ്വീകരിക്കും. സ്വകാര്യ ഇൻഷുറൻസ് പരിരക്ഷ ഇല്ലാത്തവരും വാർഷിക കുടുംബ വരുമാനം 90,000 ഡോളറിൽ താഴെയുമുള്ള കനേഡിയൻ പൗരന്മാർ ഈ ആനുകൂല്യത്തിന് അർഹരാണ്. ജൂൺ രണ്ട് ചൊവ്വാഴ്ച രാവിലെ 8 മണി മുതൽ ഓൺലൈനായും ഫോൺ വഴിയും യോഗ്യരായ പൗരന്മാർക്ക് അപേക്ഷകൾ സമർപ്പിക്കാം. നിലവിൽ ഈ ആനുകൂല്യം ലഭിച്ചുകൊണ്ടിരിക്കുന്നവർ പരിരക്ഷ തുടരുന്നതിനായി ജൂൺ ഒന്നിനകം തങ്ങളുടെ അക്കൗണ്ടുകൾ പുതുക്കണമെന്നും ഹെൽത്ത് കാനഡ അധികൃതർ ഓർമ്മിപ്പിച്ചു.
പുതിയ അപേക്ഷകർ കാനഡയിലെ നികുതി റിട്ടേണുകൾ കൃത്യമായി സമർപ്പിച്ചവരും സോഷ്യൽ ഇൻഷുറൻസ് നമ്പറോടു കൂടിയ വ്യക്തിഗത വിവരങ്ങൾ ഉള്ളവരുമായിരിക്കണം. കാനഡയിലുടനീളമുള്ള 28,000-ത്തിലധികം ദന്തചികിത്സാ വിദഗ്ധർ ഈ പദ്ധതിയുമായി സഹകരിക്കുന്നുണ്ട്. അതേസമയം, പദ്ധതിയുടെ പേരിൽ വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും ആവശ്യപ്പെട്ട് വൻതോതിൽ തട്ടിപ്പുകൾ നടക്കാൻ സാധ്യതയുണ്ടെന്നും, അപേക്ഷ സമർപ്പിക്കുന്നതിനോ പുതുക്കുന്നതിനോ സർക്കാർ യാതൊരുവിധ പണവും ഈടാക്കില്ലെന്നും അധികൃതർ ജനങ്ങൾക്ക് കർശന മുന്നറിയിപ്പ് നൽകിയിട്ടുണ്ട്.
