കോയമ്പത്തൂരിലെ തൊണ്ടാംമുത്തൂർ വടിവേലം പാളയത്തിൽ വെറും ഒരു രൂപയ്ക്ക് ഇഡ്ഡലി വിറ്റ് സാധാരണക്കാരുടെ വിശപ്പകറ്റുന്ന 90 കാരിയായ കമ്മലാമ്മാൾ എന്ന ‘ഇഡ്ഡലിപ്പാട്ടി’, ഗ്യാസ് സിലിണ്ടർ ലഭിക്കാത്തതിനെത്തുടർന്ന് നേരിട്ടിരുന്ന പ്രതിസന്ധിക്ക് വിരാമമായി. രണ്ടു മാസമായി സൗജന്യമായി ലഭിക്കേണ്ടിയിരുന്ന വാണിജ്യ സിലിണ്ടറുകൾ കിട്ടാതായതോടെ പാട്ടിയുടെ വിശപ്പകറ്റൽ യജ്ഞം മുടങ്ങിപ്പോയിരുന്നു.
ആനന്ദ് മഹീന്ദ്രയുടെ സമൂഹ മാധ്യമ പേജിലൂടെ ദേശീയ ശ്രദ്ധനേടിയ പാട്ടിക്ക് മുൻപ് മഹീന്ദ്ര ഫൗണ്ടേഷൻ വീട് നിർമിച്ചു നൽകിയിരുന്നു. പ്രദേശത്തെ ഭാരത് ഗ്യാസ് ഏജൻസി സൗജന്യമായി നൽകിയിരുന്ന സിലിണ്ടറുകളുടെ ലഭ്യത കുറഞ്ഞതും വിതരണം വൈകിയതുമാണ് പ്രതിസന്ധിക്ക് കാരണമായത്. തുടർന്ന് തിങ്കളാഴ്ച കലക്ടറുടെ അദാലത്തിൽ പരാതി നൽകിയതോടെ വിഷയം അധികൃതരുടെ ശ്രദ്ധയിൽപ്പെടുകയായിരുന്നു.
കലക്ടറുടെയും ജില്ലാ സപ്ലൈ ഓഫിസറുടെയും നേരിട്ടുള്ള ഇടപെടലിനെ തുടർന്ന് ഏജൻസി ഉടൻ തന്നെ മൂന്ന് വാണിജ്യ സിലിണ്ടറുകൾ പാട്ടിയുടെ പാചകപ്പുരയിൽ എത്തിച്ചു നൽകി. ഇതോടെ അടുപ്പുകൾ വീണ്ടും സജീവമാവുകയും, സ്നേഹവും രുചിയുമേറിയ ഇഡ്ഡലിയുടെയും സാമ്പാറിന്റെയും മണം അവിടെ പരക്കുകയും ചെയ്തു. മരണം വരെയും ഒരു രൂപയ്ക്ക് വിശപ്പകറ്റുക മാത്രമാണ് തന്റെ ആഗ്രഹമെന്ന് കമ്മലാമ്മാൾ പാട്ടി സന്തോഷത്തോടെ പറയുന്നു.
