ഖലിസ്ഥാൻ വിഘടനവാദി നേതാവ് ഹർദീപ് സിങ് നിജ്ജാറിന്‍റെ കൊലപാതകത്തിൽ മുഖ്യപ്രതിയെന്ന സംശയിക്കുന്ന ഗോൾഡി ബ്രാർ എന്നറിയപ്പെടുന്ന സതീന്ദർജീത് സിങ്ങിനായുള്ള തിരച്ചിൽ ശക്തമാക്കി ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്ബിഐ). ഗോൾഡി ബ്രാറിനെക്കുറിച്ച് വിവരം നൽകുന്നവർക്ക് 10 ലക്ഷം ഡോളർ പാരിതോഷികം നൽകുമെന്നും എഫ്ബിഐ പ്രഖ്യാപിച്ചു. ലോറൻസ് ബിഷ്ണോയിയുടെ നേതൃത്വത്തിലുള്ള ക്രിമിനൽ സംഘവുമായി (Lawrence Bishnoi Organized Crime Group) ഗോൾഡി ബ്രാറിന് ബന്ധമുണ്ടെന്ന് എഫ്ബിഐ പറയുന്നു. യുഎസിലും കാനഡയിലുടനീളവും വിവിധ അക്രമ പ്രവർത്തനങ്ങളിൽ ഈ സംഘം ഏർപ്പെട്ടിട്ടുണ്ടെന്ന് എഫ്ബിഐ വ്യക്തമാക്കി.

അതിർത്തി കടന്നുള്ള കുറ്റകൃത്യങ്ങൾ തടയാൻ എഫ്ബിഐ നടത്തുന്ന ഈ നീക്കത്തെ കനേഡിയൻ സർക്കാർ സ്വാഗതം ചെയ്തു. ബ്രാറിനെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ എഫ്ബിഐയുടെ 1-800-CALL-FBI (1-800-225-5324) എന്ന നമ്പറിൽ അറിയിക്കണമെന്ന് അധികൃതർ അഭ്യർത്ഥിച്ചു.

2023-ൽ ബ്രിട്ടീഷ് കൊളംബിയയിലെ സറേയിലുള്ള ഒരു സിഖ് ക്ഷേത്രത്തിന് സമീപത്താണ് ഹർദീപ് സിങ് നിജ്ജാർ വെടിയേറ്റ് കൊല്ലപ്പെട്ടത്. ഈ കൊലപാതകത്തിൽ ഗോൾഡി ബ്രാറിനെതിരെ കനേഡിയൻ പൊലീസ് കുറ്റം ചുമത്തിയിരുന്നു. നിജ്ജാറിന്‍റെ കൊലപാതകത്തിൽ ഇന്ത്യൻ ഏജൻ്റുമാർക്ക് പങ്കുണ്ടെന്ന് മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോ ആരോപിച്ചതോടെ ഇരുരാജ്യങ്ങളും തമ്മിലുള്ള നയതന്ത്ര ബന്ധം വഷളായായിരുന്നു. എന്നാൽ, നിജ്ജാർ വധക്കേസിൽ ഇന്ത്യൻ ഭരണകൂടത്തിന് നേരിട്ട് പങ്കുള്ളതായി നിലവിൽ തെളിവുകളൊന്നുമില്ലെന്ന് കനേഡിയൻ പൊലീസ് വ്യക്തമാക്കിയിട്ടുണ്ട്.