വാരാന്ത്യം മുതൽ ഷിക്കാഗോയിൽ കനത്ത ചൂടും ഈർപ്പമുള്ള കാലാവസ്ഥയും തിരിച്ചെത്തുമെന്ന് നാഷണൽ വെതർ സർവീസ് (NOAA) മുന്നറിയിപ്പ് നൽകി. ഞായറാഴ്ച താപനില 32.2 ഡിഗ്രിക്ക് മുകളിലെത്തുമെന്നും, ചിലയിടങ്ങളിൽ താപനില സൂചിക (Heat Index) 40.5 ഡിഗ്രി വരെ ഉയരാൻ സാധ്യതയുണ്ടെന്നും കാലാവസ്ഥാ നിരീക്ഷകർ അറിയിച്ചു. ലിവിങ്സ്റ്റൺ, ബൂൺ, ലാസല്ലെ, ലീ, ഒഗി, വിന്നെബാഗോ എന്നീ കൗണ്ടികളിൽ ഞായറാഴ്ച ഉച്ചയ്ക്കു 12 മുതൽ രാത്രി 8 മണിവരെ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
ഞായറാഴ്ച പകൽ സമയത്ത് പൊതുവെ തെളിഞ്ഞ കാലാവസ്ഥയായിരിക്കുമെങ്കിലും, വൈകിട്ടോടെ ചില സ്ഥലങ്ങളിൽ ഒറ്റപ്പെട്ട മഴയോ ഇടിമിന്നലോ ഉണ്ടാകാൻ 30 മുതൽ 40 ശതമാനം വരെ സാധ്യതയുണ്ട്. രാത്രിയോടെ കാട്ടുതീയിൽ നിന്നുള്ള പുക അന്തരീക്ഷത്തെ ചെറിയ തോതിൽ ബാധിച്ചേക്കാം. മിഡ്വെസ്റ്റ് പ്രദേശങ്ങളിൽ ശക്തമായ ഇടിമിന്നലോടുകൂടിയ കാറ്റിനും സാധ്യതയുണ്ടെന്നും ഏജൻസി പ്രവചിക്കുന്നു.
