പ്രോഗ്രാമിങ് ഭാഷയിൽ ഗുരുതര സുരക്ഷാ പിഴവ് കണ്ടെത്തിയതിനെ തുടർന്ന് കാനഡയിലെയും യൂറോപ്പിലെയും സർക്കാർ വെബ്സൈറ്റുകൾ താൽക്കാലികമായി ഓഫ്‌ലൈനാക്കി. ലോകത്തെ വെബ്‌സൈറ്റുകളിൽ ഏകദേശം 70 ശതമാനവും പ്രവർത്തിക്കുന്ന പി.എച്ച്.പി (PHP) കോഡിങിലാണ് സുരക്ഷാ പ്രശ്നം കണ്ടെത്തിയിരിക്കുന്നത്. പി.എച്ച്.പി കോഡിങിലെ തകരാർ കാരണം വിവരങ്ങൾ ചോർത്താനും വെബ്സൈറ്റുകൾ പൂർണ്ണമായി നിയന്ത്രണത്തിലാക്കാനും ഹാക്കർമാർക്ക് കഴിയുമെന്ന് സൈബർ സുരക്ഷാ വിദഗ്ദ്ധർ മുന്നറിയിപ്പ് നൽകി. ബുധനാഴ്ചയോടെ ഇതിന്‍റെ പ്രാരംഭ ലക്ഷണങ്ങൾ കണ്ടുതുടങ്ങിയതായി ക്ലൗഡ്‌ഫ്ലെയർ അറിയിച്ചിട്ടുണ്ട്.
കാനഡയിലെ ചില ഫെഡറല്‍ സര്‍ക്കാര്‍ വെബ്സൈറ്റുകള്‍ മുന്‍കരുതല്‍ നടപടിയുടെ ഭാഗമായി താല്‍ക്കാലികമായി പ്രവര്‍ത്തനം നിര്‍ത്തിയതായി ആര്‍ട്ടിഫിഷ്യല്‍ ഇന്‍റലിജന്‍സ് മന്ത്രി ഇവാന്‍ സോളമന്‍ അറിയിച്ചു. പ്രശ്നം പരിഹരിച്ച ഉടൻ തന്നെ വെബ്സൈറ്റുകൾ തിരികെ പ്രവർത്തനക്ഷമമാക്കുമെന്നും അദ്ദേഹം പറഞ്ഞു. പി.എച്ച്.പി ഉപയോഗിക്കുന്ന സ്ഥാപനങ്ങളും ബിസിനസ്സുകളും എത്രയും പെട്ടെന്ന് സുരക്ഷാ അപ്‌ഡേറ്റുകൾ ഇൻസ്റ്റാൾ ചെയ്യണമെന്ന് സൈബർ സെൻ്റർ നിർദ്ദേശിച്ചിട്ടുണ്ട്. ഉടൻ പരിഹാരം കാണാൻ സാധിക്കാത്ത വെബ്സൈറ്റുകൾ താൽക്കാലികമായി ഇൻ്റർനെറ്റിൽ നിന്ന് മാറ്റിനിർത്താനും അധികൃതർ ആവശ്യപ്പെട്ടിട്ടുണ്ട്.
കനേഡിയൻ സെന്‍റര്‍ ഫോര്‍ സൈബര്‍ സെക്യൂരിറ്റി, സ്റ്റാറ്റിസ്റ്റിക്‌സ് കാനഡ എന്നിവയുടെ വെബ്സൈറ്റുകളും ഓഫ്‌ലൈനിലാക്കിയിരുന്നു. കൂടാതെ ന്യൂഫിൻലൻഡ് ആൻഡ് ലാബ്രഡോർ, പ്രിൻസ് എഡ്വേഡ് ഐലൻഡ് പ്രവിശ്യകളുടെ ഔദ്യോഗിക വെബ്സൈറ്റുകളും ഇലക്ഷന്‍സ് ബിസിയുടെ സൈറ്റും പ്രവർത്തനം നിർത്തിയിരുന്നു.
