സാമ്പത്തിക ഭദ്രത ഉറപ്പാക്കുന്നതിനും തപാൽ സർവീസ് ആധുനികവൽക്കരിക്കുന്നതിന്റെയും ഭാഗമായി മാറ്റങ്ങളുമായി കാനഡ പോസ്റ്റ് രംഗത്ത്. വീട്ടുപടിക്കൽ നേരിട്ട് തപാൽ എത്തിക്കുന്ന ‘ഡോർ-ടു-ഡോർ’ ഡെലിവറി ഘട്ടംഘട്ടമായി നിർത്തലാക്കുന്ന കാനഡ പോസ്റ്റ് പകരം കമ്മ്യൂണിറ്റി മെയിൽബോക്സുകൾക്ക് തുടക്കമിടാനും തയ്യാറെടുക്കുന്നു. തപാൽ സാധനങ്ങൾ വീടുകളിൽ നേരിട്ട് എത്തിക്കുന്നതിന് പകരം നിശ്ചിത കേന്ദ്രങ്ങളിൽ സ്ഥാപിച്ചിട്ടുള്ള കമ്മ്യൂണിറ്റി മെയിൽബോക്സുകളിൽ എത്തിക്കുന്നതാണ് ഈ രീതി. കാനഡ പോസ്റ്റിന്റെ പ്രവർത്തനച്ചെലവ് കുറയ്ക്കുകയും സാമ്പത്തികമായി സ്വയംപര്യാപ്തമാവുകയും ചെയ്യുക എന്നതാണ് ഈ പരിഷ്കാരത്തിലൂടെ ലക്ഷ്യമിടുന്നത്. ഈ മാറ്റത്തിലൂടെ തപാൽ സാധനങ്ങൾ കൂടുതൽ സുരക്ഷിതമായി സൂക്ഷിക്കാൻ കഴിയുമെന്ന് അധികൃതർ അവകാശപ്പെടുന്നു.
2027-ഓടെ നിലവിലുള്ളതിന് പുറമെ രാജ്യത്തുടനീളമുള്ള 4,85,000 വിലാസങ്ങളിലേക്ക് കൂടി ഈ പുതിയ സംവിധാനം ഒരുക്കുമെന്ന് കാനഡ പോസ്റ്റ് അറിയിച്ചു. 2026 അവസാനമോ 2027-ന്റെ തുടക്കത്തിലോ 1,36,000 വിലാസങ്ങളിൽ കൂടി കമ്മ്യൂണിറ്റി മെയിൽബോക്സുകൾ സ്ഥാപിക്കാൻ നേരത്തെ തന്നെ തീരുമാനിച്ചിരുന്നു. വരും ദിവസങ്ങളിൽ ബന്ധപ്പെട്ട കമ്മ്യൂണിറ്റികളിലെ അധികൃതരുമായി കാനഡ പോസ്റ്റ് ചർച്ചകൾ ആരംഭിക്കും. നിലവിൽ കാനഡയിലെ നാലിൽ മൂന്ന് വിലാസങ്ങളിലും കമ്മ്യൂണിറ്റി മെയിൽബോക്സുകൾ വഴിയാണ് തപാൽ സേവനം ലഭ്യമാക്കുന്നത്.
