ടൊറൻ്റോ നഗരത്തിൻ്റെ സബർബൻ മേഖലകളിലെ വാഹന ഉടമകൾക്ക് തിരിച്ചടിയായി ഇൻഷുറൻസ് പ്രീമിയം തുക വർദ്ധിക്കാൻ സാധ്യതയുണ്ടെന്ന് റിപ്പോർട്ട്. ഈ മേഖലകളിൽ വർദ്ധിച്ചുവരുന്ന അപകടനിരക്കുകളും ക്ലെയിമുകളുടെ എണ്ണവുമാണ് ഈ നിരക്ക് വർദ്ധനയ്ക്ക് പ്രധാന കാരണമെന്ന് റിപ്പോർട്ടിൽ പറയുന്നു. ഗ്രേറ്റർ ടൊറൻ്റോ ഏരിയയിലെ വോൺ, ബ്രാംപ്ടൺ , മിസിസാഗ തുടങ്ങിയ സബർബൻ നഗരങ്ങളിലെ താമസക്കാരാണ് ഈ വില വർദ്ധനവിൻ്റെ ആഘാതം പ്രധാനമായും നേരിടേണ്ടി വരിക. നിലവിൽ ഒൻ്റാരിയോയിലെ തന്നെ ഏറ്റവും ഉയർന്ന ഇൻഷുറൻസ് നിരക്കുകൾ രേഖപ്പെടുത്തുന്ന പ്രദേശങ്ങളാണിവ.
നഗര കേന്ദ്രങ്ങളെ അപേക്ഷിച്ച് സബർബൻ മേഖലകളിൽ ദീർഘദൂര യാത്രകൾ ചെയ്യുന്നവരുടെ എണ്ണം കൂടുന്നതും, കനത്ത ട്രാഫിക് ബ്ലോക്കുകൾ മൂലം അപകട സാധ്യത വർദ്ധിക്കുന്നതിനാലും ഇൻഷുറൻസ് കമ്പനികൾ ഈ പ്രദേശങ്ങളെ ഉയർന്ന റിസ്ക് വിഭാഗത്തിലാണ് ഉൾപ്പെടുത്തിയിരിക്കുന്നത്. കൂടാതെ നവീന സാങ്കേതികവിദ്യകളോടെ പുറത്തിറങ്ങുന്ന ആധുനിക വാഹനങ്ങളുടെയും ഇലക്ട്രിക് വണ്ടികളുടെയും റിപ്പയറിംഗ് ചെലവുകളിൽ ഉണ്ടായ വൻ വർദ്ധനവും പ്രീമിയം തുക കൂട്ടാൻ കമ്പനികളെ പ്രേരിപ്പിക്കുന്നു. ഈ സാഹചര്യത്തിൽ വാഹന ഉടമകൾ വിവിധ ഇൻഷുറൻസ് കമ്പനികളുടെ നിരക്കുകൾ താരതമ്യം ചെയ്ത് കൃത്യമായ പോളിസികൾ തിരഞ്ഞെടുക്കണമെന്നും, മികച്ച ഡ്രൈവിംഗ് റെക്കോർഡ് സൂക്ഷിക്കുന്നത് വഴി ഒരു പരിധി വരെ തുക കുറയ്ക്കാൻ സാധിക്കുമെന്നും അധികൃതർ നിർദ്ദേശിക്കുന്നു.
