പാര്ലമെന്റില് പാര്ട്ടിയെ നയിക്കാന് മുന് പാര്ട്ടി ലീഡറും സസ്കാച്വാന് എംപിയുമായ ആന്ഡ്രൂ ഷീറിനെ കണ്സര്വേറ്റീവ് കോക്കസ് തിരഞ്ഞെടുത്തു. മെയ് 26-ന് പാര്ലമെന്റ് സമ്മേളനം ആരംഭിക്കുമ്പോള് ഹൗസ് ഓഫ് കോമണ്സില് അദ്ദേഹം പ്രതിപക്ഷ നേതാവിന്റെ ചുമതലകള് ഏറ്റെടുക്കും. തിരഞ്ഞെപ്പ് പരാജയത്തിന് ശേഷം മുന്നോട്ടുള്ള പാത ആസൂത്രണം ചെയ്യുന്നതിനായി ഓട്ടവയില് ചേര്ന്ന കണ്സര്വേറ്റീവ് പാര്ട്ടിയുടെ യോഗത്തിലാണ് തീരുമാനം. 20 വര്ഷത്തിനു ശേഷം കണ്സര്വേറ്റീവ് ലീഡര് പിയേര് പൊളിയേവ് കാള്ട്ടണ് റൈഡിങില് പരാജയപ്പെട്ട സാഹചര്യത്തിലാണ് പുതിയ ഇടക്കാല പ്രതിപക്ഷ നേതാവിനെ തിരഞ്ഞെടുത്തത്.
പിയേര് പൊളിയേവ് പാര്ലമെന്റിലേക്ക് മടങ്ങിയെത്തുന്നത് വരെ പ്രതിപക്ഷ നേതാവായി തുടരുമെന്ന് കോക്കസ് യോഗത്തിന് ശേഷം ആന്ഡ്രൂ ഷീര് പ്രതികരിച്ചു. അതേസമയം പിയേര് പൊളിയേവ് ആല്ബര്ട്ടയിലെ ബാറ്റില് റിവര്- ക്രൗഫൂട്ട് റൈഡിങ്ങില് നിന്നും വീണ്ടും പാര്ലമെന്റിലേക്ക് മത്സരിക്കും. ഈ റൈഡിങ്ങില് പാര്ട്ടി നേതാവിന് മത്സരിക്കാന് അവസരം നല്കുന്നതിനായി നിലവിലെ എംപി ഡാമിയന് കുറേക് സീറ്റ് ഒഴിഞ്ഞുകൊടുക്കാന് സന്നദ്ധതയറിയിച്ചതോടെയാണ് പൊളിയേവ് ഉപതിരഞ്ഞെടുപ്പില് മത്സരിക്കാനൊരുങ്ങുന്നത്.
