എഡ്മിന്റൻ : ആൽബർട്ടയിലെ ആശുപത്രികളിലെ അത്യാഹിത വിഭാഗങ്ങളിൽ (Emergency Room) ചികിത്സ തേടിയെത്തുന്ന രോഗികൾക്ക് മണിക്കൂറുകളോളം കാത്തിരിക്കേണ്ടി വരുന്ന അവസ്ഥ തുടരുന്നു. പ്രവിശ്യയിൽ അത്യാഹിത വിഭാഗങ്ങളിൽ ചികിത്സ ലഭിക്കുന്നതിനായി രോഗികൾ ശരാശരി നാല് മണിക്കൂർ വരെ കാത്തിരിക്കേണ്ടി വരുന്നതായി മോൺട്രിയൽ ഇക്കണോമിക് ഇൻസ്റ്റിറ്റ്യൂട്ട് (MEI) പുറത്തുവിട്ട റിപ്പോർട്ടിൽ പറയുന്നു.
ആൽബർട്ടയിലെ ഏറ്റവും തിരക്കേറിയ ആശുപത്രികളിൽ ഒന്നായ കാൽഗറിയിലെ ‘ഫൂട്ട്ഹിൽസ് മെഡിക്കൽ സെന്ററിൽ’ (Foothills Medical Centre) രോഗികൾക്ക് ഏകദേശം ഏഴ് മണിക്കൂറും 28 മിനിറ്റുമാണ് വിദഗ്ധ ചികിത്സയ്ക്കായി കാത്തിരിക്കേണ്ടി വരുന്നു. അതേസമയം പ്രവിശ്യാ തലസ്ഥാനമായ എഡ്മിന്റനിലെ ‘മിസെറികോർഡിയ ഹോസ്പിറ്റലിൽ’ (Misericordia Hospital) ഇത് ഏകദേശം ആറ് മണിക്കൂറും 39 മിനിറ്റുമാണ്.
തിരക്ക് കുറയ്ക്കുന്നതിനായി, ‘ഇമ്മീഡിയറ്റ് കെയർ ക്ലിനിക്കുകൾ’ (immediate care clinics), നഴ്സിങ് ക്ലിനിക്കുകൾ എന്നിവയുടെ എണ്ണം വർധിപ്പിക്കുക , ഫാർമസികൾക്ക് മരുന്നുകൾ കുറിച്ചുനൽകാനോ (prescriptions) നിലവിലുള്ളവ പുതുക്കി നൽകാനോ അധികാരം നൽകുക, ടെലിമെഡിസിൻ സൗകര്യങ്ങൾ വിപുലീകരിക്കുക, കൂടാതെ വിവിധ ചികിത്സാ രീതികൾ സംയോജിപ്പിച്ചുള്ള ‘മിക്ഡ് പ്രാക്ടീസ്’ (mixed practice) നടപ്പിലാക്കുക തുടങ്ങിയ നിർദ്ദേശങ്ങൾ MEI മുന്നോട്ടുവെക്കുന്നു.








