അസം സ്വദേശിയുടെ പേരിൽ വ്യാജമായി ബാങ്ക് അക്കൗണ്ട് ആരംഭിച്ച് മണ്ണ് മാഫിയയിൽ നിന്നും പ്രതികളിൽ നിന്നും യുപിഐ വഴി കൈക്കൂലി വാങ്ങിയ കേസിൽ വൈക്കം മുൻ സിഐ ഷമീർഖാനെ വിജിലൻസ് അറസ്റ്റ് ചെയ്തു. വിജിലൻസ് നേരത്തെ തന്നെ ഇയാൾക്കെതിരെ കേസെടുക്കുകയും സർവീസിൽ നിന്ന് സസ്പെൻഡ് ചെയ്യുകയും ചെയ്തിരുന്നു.
2026 സെപ്റ്റംബർ 5-നാണ് വൈക്കം കനറാ ബാങ്ക് ശാഖയിൽ അസം സ്വദേശിയെക്കൊണ്ട് ഷമീർഖാൻ പുതിയ അക്കൗണ്ട് എടിപ്പിച്ചത്. അരുൺ എന്ന വൈക്കം സ്വദേശിയുടെ ഫോൺ നമ്പരാണ് ഇതിനായി ഉപയോഗിച്ചതെങ്കിലും, അക്കൗണ്ടിന്റെ എടിഎം കാർഡും സിം കാർഡും ഷമീർഖാൻ തന്നെയാണ് കൈവശം വെച്ചിരുന്നത്. തുടർന്ന് മണ്ണ് മാഫിയ അംഗങ്ങൾ, ടിപ്പർ ലോറി ഉടമകൾ, വിവിധ കേസുകളിലെ പ്രതികൾ എന്നിവരിൽ നിന്നായി സെപ്റ്റംബർ 5 മുതൽ ഒക്ടോബർ 16 വരെയുള്ള കാലയളവിൽ 2,27,000 രൂപ ഇയാൾ ഈ അക്കൗണ്ട് വഴി കൈക്കൂലിയായി വാങ്ങിയെന്നാണ് വിജിലൻസ് കണ്ടെത്തിയത്.
വൈക്കം, കുറവിലങ്ങാട് ഭാഗങ്ങളിലെ വിവിധ എടിഎമ്മുകളിൽ നിന്നാണ് അക്കൗണ്ടിലെത്തിയ പണം ഷമീർ പിൻവലിച്ചിരുന്നത്. ഇതേക്കുറിച്ച് രഹസ്യവിവരം ലഭിച്ചതിനെ തുടർന്ന് ഒക്ടോബർ 16-ന് വൈക്കം സിഐ ഓഫീസിൽ വിജിലൻസ് നടത്തിയ മിന്നൽ പരിശോധനയിലാണ് ഈ വൻ തട്ടിപ്പ് പുറത്തുവന്നത്. തുടർന്ന് അക്കൗണ്ടിന്റെ എടിഎം കാർഡും സിം കാർഡും വിജിലൻസ് ഇയാളിൽ നിന്ന് പിടിച്ചെടുക്കുകയുണ്ടായി. ചങ്ങനാശേരി, കറുകച്ചാൽ, കമ്പംമെട്ട് തുടങ്ങിയ സ്റ്റേഷനുകളിൽ ജോലി ചെയ്തിരുന്ന കാലത്തും ഷമീർഖാനെതിരെ സമാനമായ ആരോപണങ്ങൾ ഉയർന്നിരുന്നു.
