റോഡ് നിയമങ്ങൾ കാറ്റിൽപ്പറത്തി ഹെൽമറ്റോ ലൈസൻസോ ഇല്ലാതെ ഇരുചക്രവാഹനങ്ങളിൽ അപകടകരമായി യാത്ര ചെയ്യുന്ന സംഭവങ്ങൾ വർധിച്ചു വരികയാണ്. എഐ ക്യാമറകളെ വെട്ടിക്കാൻ നമ്പർ പ്ലേറ്റുകൾ മറച്ചുവെച്ചും മൂന്നുപേരെ കയറ്റി (ട്രിപ്പിളടിച്ച്) വാഹനം ഓടിച്ചുമുള്ള അഭ്യാസപ്രകടനങ്ങളാണ് പലയിടത്തും നടക്കുന്നത്. കോളേജ് വിദ്യാർഥികൾക്ക് വാഹനങ്ങൾ വാങ്ങി നൽകുന്ന രക്ഷിതാക്കൾ പലപ്പോഴും ഇത്തരം ഗുരുതരമായ നിയമലംഘനങ്ങൾ അറിയുന്നതുപോലുമില്ല. വയനാട് ദേശീയപാതയിലെ കുന്ദമംഗലം മുതൽ താമരശ്ശേരി വരെയുള്ള ഭാഗങ്ങളിൽ പ്രായഭേദമന്യേ നിരത്തുകളിൽ നിയമങ്ങൾ പാലിക്കപ്പെടാത്ത സ്ഥിതിയാണെന്ന് പോലീസ് ചൂണ്ടിക്കാണിക്കുന്നു.
ഇതിനിടെയാണ് കോഴിക്കോട് മെഡിക്കൽ കോളജിന് സമീപമുള്ള കോവൂർ ഇരിങ്ങാടൻ പള്ളിയിൽ രാത്രി എട്ടരയോടെ പോലീസ് നടത്തിയ പരിശോധനയിൽ നാടകീയ സംഭവങ്ങൾ അരങ്ങേറിയത്. റോഡരികിൽ ലുക്കിംഗ് ഗ്ലാസുകൾ ഇല്ലാതെ നിർത്തിയിട്ടിരുന്ന ഒരു ഇരുചക്രവാഹനം കണ്ട് സംശയം തോന്നിയ പോലീസ് കുട്ടികളെ ചോദ്യം ചെയ്യുകയായിരുന്നു. സൈഡ് മിററുകളെക്കുറിച്ച് ചോദിച്ചപ്പോൾ ‘പൊഴിഞ്ഞുപോയി’ എന്നും, ലൈസൻസിനെക്കുറിച്ച് ചോദിച്ചപ്പോൾ ‘വീട്ടിലാണ്’ എന്നുമായിരുന്നു കുട്ടികളുടെ മറുപടി. തുടർന്ന് തിരിച്ചറിയൽ രേഖകൾ പരിശോധിച്ച് ചോദ്യം ചെയ്തപ്പോഴാണ് പയ്യോളിയിൽ നിന്ന് രാത്രി ചായ കുടിക്കാൻ മാത്രമായി 40 കിലോമീറ്ററോളം സഞ്ചരിച്ച് എത്തിയ 17 വയസ്സുള്ള പ്രായപൂർത്തിയാകാത്ത കുട്ടികളാണ് ഇവരെന്ന് വ്യക്തമായത്.
തുടർന്ന് ഇവരുടെ വീട്ടിലേക്ക് ബന്ധപ്പെട്ട പോലീസിന് ലഭിച്ചത് അതിലും ഞെട്ടിക്കുന്ന മറുപടിയായിരുന്നു. മക്കൾ തങ്ങളുടെ മുറികളിൽ ഉറങ്ങുകയാണെന്നാണ് വീട്ടുകാർ വിചാരിച്ചിരുന്നത്. ലൈസൻസ് പോലുമില്ലാതെ രാത്രിയുടെ മറവിൽ 40 കിലോമീറ്റർ ദൂരം യാത്ര ചെയ്ത് എത്തിയ കുട്ടികളുടെ മറുപടിയും നിരുത്തരവാദപരമായ പെരുമാറ്റവും പോലീസിനെപ്പോലും തീർത്തും അമ്പരപ്പിച്ചു കളഞ്ഞു.
