മൺട്രിയോൾ : ക്യുബെക്കിൽ പേവിഷബാധ (റാബീസ്) പടർന്നു പിടിക്കുന്നതായി അധികൃതർ മുന്നറിയിപ്പ് നൽകി. എസ്ട്രി (Estrie) മേഖലയിലെ കോറ്റികൂക്ക് പട്ടണത്തിൽ പേവിഷബാധയുടെ വകഭേദമായ ‘റാക്കൂൺ റാബീസ്’ (raccoon rabies) പശുവിൽ സ്ഥിരീകരിച്ചതായി ക്യുബെക്ക് കൃഷി, മത്സ്യബന്ധന, ഭക്ഷ്യ മന്ത്രാലയം അറിയിച്ചു. ഒക്ടോബർ 30-ന് രോഗലക്ഷണങ്ങൾ കണ്ടുതുടങ്ങിയ പശു ചത്തതായും, ബുധനാഴ്ച നടത്തിയ പരിശോധനയിൽ പേവിഷബാധയുണ്ടെന്ന് സ്ഥിരീകരിച്ചതായും അധികൃതർ റിപ്പോർട്ട് ചെയ്തു.
നേരത്തെ, വേനൽക്കാലത്ത് മോണ്ടെറെജി (Montérégie) മേഖലയിൽ മൂന്ന് പൂച്ചകൾക്കും ഈ വകഭേദത്തിലുള്ള പേവിഷബാധ സ്ഥിരീകരിച്ചിരുന്നു. 2024-ൽ ആരംഭിച്ച രോഗവ്യാപനത്തിൽ, ഇതുവരെ 329 മൃഗങ്ങൾക്ക് റാക്കൂൺ റാബീസ് സ്ഥിരീകരിച്ചിട്ടുണ്ടെന്ന് പ്രവിശ്യാ സർക്കാർ അറിയിച്ചു. പ്രധാനമായും റാക്കൂണുകളെയാണ് ഈ വൈറസ് ബാധിക്കുന്നതെങ്കിലും, സ്കങ്കുകളിലും (skunks) കുറുക്കന്മാരിലും (foxes) ഇത് കണ്ടെത്തിയിട്ടുണ്ട്.
മനുഷ്യരടക്കം സസ്തനികളായ എല്ലാ ജീവികളെയും ഈ രോഗം ബാധിക്കാം. രോഗബാധയുള്ള മൃഗങ്ങളുടെ ഉമിനീർ വഴിയാണ്, പ്രത്യേകിച്ച് അവ കടിക്കുമ്പോൾ, രോഗം പകരുന്നത്. രോഗസാധ്യതയുള്ള പ്രദേശങ്ങളിൽ നിരീക്ഷണവും വാക്സിനേഷനും ശക്തമാക്കിയതായി അധികൃതർ അറിയിച്ചു. വളർത്തുമൃഗങ്ങൾക്ക് പേവിഷബാധയ്‌ക്കെതിരായ വാക്സിൻ നൽകാൻ ആഗ്രഹിക്കുന്ന കർഷകർക്ക് സാമ്പത്തിക സഹായം നൽകുന്നുണ്ടെന്നും, വളർത്തുമൃഗങ്ങൾക്ക് വാക്സിനേഷൻ നൽകാൻ എല്ലാവരും തയ്യാറാകണമെന്നും സർക്കാർ അഭ്യർത്ഥിച്ചു. പേവിഷബാധയുണ്ടാകാൻ സാധ്യതയുള്ള വന്യമൃഗങ്ങൾ, വളർത്തുമൃഗങ്ങൾ അല്ലെങ്കിൽ ഫാമുകളിലെ മൃഗങ്ങൾ എന്നിവയുമായുള്ള സമ്പർക്കം ഒഴിവാക്കാൻ ജാഗ്രത പാലിക്കണമെന്നും ആവശ്യമായ മുൻകരുതലുകൾ എടുക്കണമെന്നും മന്ത്രാലയം ഓർമ്മിപ്പിച്ചു.
