കാനഡയിൽ ഇത്തവണ നേരത്തെ ഫ്ലൂ (ഇൻഫ്ലുവൻസ) പടർന്നു പിടിച്ച സാഹചര്യത്തിൽ വാക്സിൻ സ്വീകരിക്കാൻ നിർദ്ദേശം നൽകി പകർച്ചവ്യാധി വിദഗ്ധനായ ഡോ. ഐസക് ബോഗോച്ച്. ഒക്ടോബർ പകുതിയോടെ ആരംഭിച്ച ഫ്ലൂ (ഇൻഫ്ലുവൻസ) സീസണിൽ രോഗവ്യാപനം മിതമായ തോതിലാണ്. എന്നാൽ, ജനങ്ങൾക്ക് വാക്സിൻ ലഭിക്കുന്നതിന് മുൻപേ തന്നെ രോഗവ്യാപനം തുടങ്ങിയതോടെ പരിശോധിക്കുന്ന പത്തിൽ ഒരാൾക്ക് രോഗം സ്ഥിരീകരിക്കുന്നുണ്ടെന്നും അദ്ദേഹം റിപ്പോർട്ട് ചെയ്തു.
ഫ്ലൂ സീസൺ എപ്പോൾ തുടങ്ങുമെന്ന് കൃത്യമായി പ്രവചിക്കാൻ പ്രയാസമാണ്. എന്നാൽ, സീസൺ നേരത്തെ തുടങ്ങിയതുകൊണ്ട് രോഗവ്യാപനം നേരത്തെ മൂർധന്യത്തിലെത്തുകയും (peak), നേരത്തെ തന്നെ അവസാനിക്കുകയും ചെയ്യുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു. സാധാരണയായി ക്രിസ്മസിനും പുതുവത്സരത്തിനും ഇടയിലുള്ള സമയത്താണ് ഫ്ലൂ വ്യാപനം ഏറ്റവും ശക്തമാകുന്നത്. ഫെബ്രുവരി, മാർച്ച് മാസങ്ങളോടെ തീവ്രത കുറഞ്ഞുതുടങ്ങുമെന്ന് ബോഗോച്ച് പറഞ്ഞു.
നിലവിൽ പടർന്നു പിടിക്കുന്ന H3N2, H1N1 എന്നീ രണ്ട് തരം ഇൻഫ്ലുവൻസ വൈറസുകൾക്കും ഗുരുതര ആരോഗ്യപ്രശ്നങ്ങൾ സൃഷ്ടിക്കാൻ ശേഷിയുണ്ടെന്ന് അദ്ദേഹം വ്യക്തമാക്കി. കഴിഞ്ഞ വർഷം H3N2 വൈറസായിരുന്നു കൂടുതലായി കണ്ടുവന്നതെങ്കിൽ, ഈ വർഷം H1N1 വൈറസാണ് കൂടുതൽ വ്യാപകമായി കാണപ്പെടുന്നതെന്നും ഡോ. ബോഗോച്ച് അറിയിച്ചു. രോഗബാധ ഒഴിവാക്കാൻ ജനങ്ങൾ എത്രയും വേഗം വാക്സിൻ സ്വീകരിക്കണമെന്ന് ഡോ. ഐസക് ബോഗോച്ച് അഭ്യർത്ഥിച്ചു.
