ഫെഡറൽ ബ്യൂറോ ഓഫ് ഇൻവെസ്റ്റിഗേഷന്‍റെ (FBI) രഹസ്യ വിവരങ്ങൾ ചോർത്തിയെന്ന് ആരോപണം നേരിടുന്ന കനേഡിയൻ പൗരൻ യുഎസിൽ അറസ്റ്റിലായി. സൈബർ സുരക്ഷാ ഉദ്യോഗസ്ഥൻ എഡ്വേർഡ് ഡുബ്രോവ്സ്കിയാണ് അറസ്റ്റിലായത്. സൈബർ കുറ്റകൃത്യങ്ങളുമായി ബന്ധപ്പെട്ട് പ്രവർത്തിക്കുന്ന ‘ഷൈനി ഹണ്ടേഴ്സ്’ (ShinyHunters) എന്ന ഹാക്കിങ് സംഘവുമായി എഡ്വേർഡ് ഡുബ്രോവ്സ്കിയ്ക്ക് ബന്ധമുണ്ടെന്ന് കണ്ടെത്തിയതായി അന്വേഷണ ഉദ്യോഗസ്ഥർ പറയുന്നു. 2019 മുതൽ വിവിധ സൈബർ ആക്രമണങ്ങളും ഡാറ്റ ചോർച്ചകളുമായി ഈ സംഘത്തിന് ബന്ധമുണ്ടെന്ന് കണ്ടെത്തിയതായും അന്വേഷണ ഏജൻസികൾ റിപ്പോർട്ട് ചെയ്തു.
ഡുബ്രോവ്സ്കി വിവിധ സൈബർ സുരക്ഷാ കമ്പനികളിൽ എക്സിക്യൂട്ടീവ് പദവികളിൽ പ്രവർത്തിച്ചിട്ടുള്ള വ്യക്തിയാണെന്ന് പെൻസിൽവേനിയ യു.എസ്. ജില്ലാ കോടതി രേഖകളിൽ പറയുന്നു. കൂടാതെ ഡുബ്രോവ്സ്കി സൈബർ ആക്രമണങ്ങൾക്ക് ഇരയായ സ്ഥാപനങ്ങളെയും ക്ലയൻ്റുകളെയും സഹായിക്കുന്നതിൽ പരിചയസമ്പത്തുള്ള ആളാണെന്നും റിപ്പോർട്ടുകൾ സൂചിപ്പിക്കുന്നു.
