നിക്ഷേപകർക്ക് യുഎസ് ഗ്രീൻ കാർഡ് ലഭ്യമാക്കുന്ന പ്രമുഖ ഇമിഗ്രൻ്റ് ഇൻവെസ്റ്റർ പ്രോഗ്രാമായ ഇ.ബി-5 (EB-5) വീസ അപേക്ഷാ ഫീസുകൾ അമേരിക്കൻ പൗരത്വ-കുടിയേറ്റ സേവന വിഭാഗം (USCIS) കുത്തനെ വർധിപ്പിച്ചു. നവംബർ 30 മുതൽ പുതിയ നിരക്കുകൾ പ്രാബല്യത്തിൽ വരും. നിലവിലെ കുറഞ്ഞ നിരക്കിൽ അപേക്ഷ സമർപ്പിക്കാൻ തയ്യാറെടുക്കുന്ന നിക്ഷേപകർക്ക് നവംബർ 29 വരെ മാത്രമാണ് ഇനി അവസരമുള്ളത്.
റീജനൽ സെന്‍റർ വഴി ഫയൽ ചെയ്യുന്ന നിക്ഷേപകരുടെ പ്രാഥമിക ഫോം I-526E ഫീസ് നിലവിലെ 3,675 ഡോളറിൽ നിന്ന് 4,175 ഡോളർ വർധിച്ച് 7,850 ഡോളറാകും. വ്യക്തിഗത നിക്ഷേപകരുടെ സ്റ്റാൻഡ്‌എലോൺ ഫോം I-526 ഫീസ് 3,675 ഡോളറിൽ നിന്ന് 7,615 ഡോളറായി ഉയരും. രണ്ട് ഫോമുകളിലും 75 ഡോളർ ടെക്നോളജി ഫീസും ഉൾപ്പെടുത്തിയിട്ടുണ്ട്. ഇതിനുപുറമെ, ഗ്രീൻ കാർഡിലെ നിബന്ധനകൾ നീക്കം ചെയ്യാൻ സമർപ്പിക്കുന്ന ഫോം I-829 ഫീസ് 3,750 ഡോളറിൽ നിന്ന് 5,000 ഡോളറായും, I-526E ഫോമിനൊപ്പമുള്ള ഇ.ബി-5 ഇന്‍റഗ്രിറ്റി ഫണ്ട് ഫീസ് 1,000 ഡോളറിൽ നിന്ന് 1,100 ഡോളറായും ഉയരും.
ഇ.ബി-5 പദ്ധതി നടത്തിപ്പിന്‍റെ യഥാർത്ഥ ചെലവുകൾക്ക് അനുസൃതമായി വരുമാനം കണ്ടെത്തുന്നതിനാണ് ഫീസ് വർധനയെന്ന് USCIS വ്യക്തമാക്കി. പദ്ധതിക്ക് പ്രതിവർഷം ശരാശരി 105 ദശലക്ഷം ഡോളർ പ്രവർത്തനച്ചെലവ് വരുമ്പോൾ നിലവിലെ ഫീസ് ഘടനയിലൂടെ 56.6 ദശലക്ഷം ഡോളർ മാത്രമാണ് ലഭിക്കുന്നത്. നിലവിലുള്ള ഒൻപത് ഇ.ബി-5 ഫോമുകളിലായി ശരാശരി 70.7% വർധനയാണ് വരുത്തിയിരിക്കുന്നത്. ഈ മാറ്റം പ്രതിവർഷം സമർപ്പിക്കപ്പെടുന്ന ഏകദേശം 16,600 ഇ.ബി-5 അപേക്ഷകളെ നേരിട്ട് ബാധിക്കുമെന്നാണ് പ്രതീക്ഷിക്കുന്നത്.
