അമേരിക്കയിൽ താമസിക്കുന്ന വിദേശ പൗരന്മാർക്കും കുടിയേറ്റക്കാർക്കും നിർണ്ണായക മുന്നറിയിപ്പുമായി യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS). താമസം മാറുമ്പോൾ യുഎസ് പോസ്റ്റൽ സർവീസിൽ വിലാസം മാറ്റുന്നത് കൊണ്ട് മാത്രം ഇമിഗ്രേഷൻ രേഖകളിലെ വിലാസം മാറുകയില്ലെന്ന് അധികൃതർ വ്യക്തമാക്കി. പോസ്റ്റ് ഓഫീസ് വഴി തപാൽ സർവീസുകൾ പുതിയ വിലാസത്തിലേക്ക് അയക്കില്ലെന്നും അതിനാൽ രണ്ട് സ്ഥാപനങ്ങളിലും വിദേശ പൗരന്മാർ നേരിട്ട് വിലാസം പുതുക്കേണ്ടത് നിർബന്ധമാണെന്നും ഏജൻസി ഓർമ്മിപ്പിച്ചു.
കുടിയേറ്റ വീസകൾക്കോ മറ്റ് ആനുകൂല്യങ്ങൾക്കോ വേണ്ടി അപേക്ഷ സമർപ്പിച്ച് കാത്തിരിക്കുന്ന ഇന്ത്യക്കാരുൾപ്പെടെയുള്ള വിദ്യാർത്ഥികൾക്കും ഉദ്യോഗസ്ഥർക്കും ഈ നിർദ്ദേശം ഏറെ നിർണ്ണായകമാണ്. ഇമിഗ്രേഷൻ വകുപ്പിൽ നിന്നുള്ള പ്രധാന ഔദ്യോഗിക അറിയിപ്പുകളും രേഖകളും തടസ്സമില്ലാതെ കൈപ്പറ്റാൻ കൃത്യമായ വിലാസം നൽകേണ്ടത് അപേക്ഷകരുടെ ഉത്തരവാദിത്തമാണ്. താമസം മാറി 10 ദിവസത്തിനകം പുതിയ വിലാസം ഏജൻസിയെ അറിയിച്ചിരിക്കണം.
എന്നാൽ എ (A), ജി (G) വീസ ഉടമകൾക്കും വീസ വേവർ വഴി എത്തുന്ന സന്ദർശകർക്കും ഈ നിബന്ധന ബാധകമല്ല. USCIS ഓൺലൈൻ അക്കൗണ്ട് വഴി വളരെ എളുപ്പത്തിൽ പുതിയ വിലാസം രജിസ്റ്റർ ചെയ്യാൻ സാധിക്കുമെന്നും അധികൃതർ ചൂണ്ടിക്കാട്ടി. കൃത്യസമയത്ത് വിലാസം പുതുക്കാതിരുന്നാൽ പ്രധാനപ്പെട്ട നോട്ടീസുകൾ ലഭിക്കാതിരിക്കാനും, അപേക്ഷകളിലെ നടപടിക്രമങ്ങൾ വൈകാനും, ഔദ്യോഗിക രേഖകൾ കൈയ്യിൽ കിട്ടാതെ വരാനും സാധ്യതയുണ്ടെന്നും ഏജൻസി വ്യക്തമാക്കി.
